Ka Dorbar Shnong jong ka Umiam, ka la pynpaw ba kam hun satia ia ka rukom khynra ia ki bar jylla kiba trei bylla ha kiba bun tylli ki karkhana kiba don hapoh ka Umiam Industrial Area, Ri Bhoi District ba la pynlong da ka tnad Labour Department bad ki bor ka Khasi Hills Autonomous District Council mynta ka 22 tarik Naitung 2024.
U Bah Stevenson Kharkrang, Rangbah Shnong ka Umiam, haba kren bad ki Nongthoh Khubor, u la pynpaw ba kum ka Dorbar Shnong hi hadien ka jingpyntip jong kine ki tnad treikam ka sorkar jylla ban pynlong ia ka jingkhynra ia ki kot ki sla ba biang jong ki bar jylla kiba trei bylla ha ki karkhana bapher bapher kiba don ha ka thaiñ Umiam, kum ka shnong ka la ia don bynta lang ha kane ka jingkhynra hynrei kaba sngewdiaw ka long ba kim hun satia ia ka rukom khynra ia ki kot ki sla jong ki spah ngut ki bar jylla kiba don bad trei bylla ha kane ka thaiñ.
U la ong ruh, ba kum ka Dorbar Shnong hi kam banse ban shimkhia halor kane ka kam ban phah pynbiang ia ki kot ki sla ba biang ba kynthup naduh ka Labour Lisence, Trading License, ka Police Verification ia ki bar jylla hapoh ka 3 sngi lem kumta na ka liang ka Dorbar Shnong Umiam kam banse ban shim pat da ki lad ba tyngeh pyrshah ia ki bar jylla kiba wan trei bylla ha kine ki karkhana kiba hap hapoh ka jingpeit pyrman ka Dorbar Shnong Umiam.
Shuh shuh ruh, u Bah kharkrang u la ban khia ba ka jinglait lan jong ki bar jylla ban rung shapoh ka jylla Meghalaya na ka bynta ban trei bylla khlem ka jingphikir kaba tikna ka la long ka daw bah jong ka jingkynrei u drok bad ki kam sniew hapoh ka jylla Meghalaya bad buh jingma shikatdei eh ia ki khun samla ha kylleng ki shnong jong ka Meghalaya.
Shuh shuh ka Dorbar Shnong Umiam ka la dawa ruh na ka sorkar jylla ba kan pyntreikam noh mardor ia ka District Task Force ba pura hapoh Ri Bhoi District.
