Ka party Voice of the People Party (VPP) mynta ka sngi nyngkong ka la dawa mardor na ka sorkar jylla ba dei ban pynsangeh mardor ia ka jingtih khyndew da ka Kompani National Highway & Infrastructure Development Corporation Limited (NHIDCL), kaba dei ka Kompani kaba pyntreikam ha kaba shna ia ka surok na Shillong-Dawki ha ka shnong Mawshun.
Ha ka shithi ba la phah sha ka Deputy Commissioner ka East Khasi Hills, ka Kong R.M Kurbah, u President ka VPP bad uba dei ruh u MLA ka Nongkrem, u Bah Ardent Miller Basaiawmoit, u la ong, “Kumba la pynpaw bad lap bad ruh ka jingkyrpad jong ka bor shnong, nga sngewbha ban kyrpad ia ka sorkar ban shim khia halor kane ka bynta ban pynsangeh ia ka jingtih khyndew da katei ka Kompani na ka bynta ban iada ba kan nym mih kano kano ka kynrum ka kynram hadien habud”.
“La iohi ruh ba ka jingkynduh jingeh ka long palat ban ia kaba iohi ki khmat, namarkata, na ka bynta ka kam kaba bha tam jong kito kiba ia kynduh jingeh, dei ban pynbeit noh mardor ia ki bor pyniaid shnong ne bad ka dorbar shnong” u la bynrap.
Haba pynpaw paidbah ia ka jinglap ki nongialam ka VPP kaba la jia ha ka 17 tarik u Naitung 2024 ha Mawshun, u Bah Ardent Miller Basaiawmoit u la ong ba ka VPP ha ka jingkyrpad ka bor shnong Mawshun, ka la pynlong ia ka party ban kan leit ia kynduh ia ki nongialam shnong ban ioh ia ka jingtip kaba bniah halor kane ka mat khatam ha kaba iadei bad ka jingshim jaka na ka bynta ban pynbha ia ka surok Shillong-Dawki ba hap ha ka surok national highway-40.
“La lap ba ka Kompani NHIDCL ka la pyntrei ia ka kam ban tih khyndew wat ha ki jaka bym pat ai da ki trai jaka, kaba long pyrshah ia ka rai jong ka Dorbar shnong. Shuh shuh, la kynnoh ba ka Kompani NHIDCL ka la pynpra ne tih khyndew wat ia ki jaka kaba ym pat siew da ka sorkar na ka bynta ban shna ia kane ka suork” u la ong bad ruh u la pyntip ba ki trai jaka ki la dep ban ujor da ka ejahar pyrshah ia ka Kompanni na ka bynta ka jingpynjot ia ki jaka, ki dieng, ki jingthung jingtep bad ki jhur ki jhep jong ki nongshong shnong.
Ka long ruh kaba shai kdar ba ki wahduid bad ki wah kiba don sawdong jong kane ka jaka ki shah ktah jur bad ka pynjot ruh ia ki jingthung jingtep. Kane ka jingleh ka kompani kan pynduna ruh ia ka jingdon ki khlaw bad ka ktah jur ruh ia ka mei mariang. Dei halor kane ka Nongrim ka la pynlong ruh ia ka Dorbar shnong ym ba ka pyrshah ia kane ka jingshna ia ka surok, hynrei kaei kaba ki angnud ka long ban pyniaid ia ka surok da ka surok kaba la don lypa, la pynpaw u Bah Basaiawmoit
