Ka skul Savio Higher Secondary School Baridua ba la pyniaid da ki sister SMMI kaba dei kawei naki shlem pule kaba la nang kiew ban ai ka jingshakri sha ki samla pule ka thaiñ Baridua kala nangpynjanai haka rukom treikam ban pynphriang ka jingstad sha ki khynnah skul ha kaba mynta ka sngi kala ioh ban plie ïaka Science Lab naka bynta ki khynnah pule Science katkum ka juk mynta.
Kum ban shu pynpaw ba ka skul Savio HSS mynta u snem ka dang shu pyniar ïaka tnad pule Science bad kane ka long ka jingkyrkhu kaba khraw ïaki khynnah pule khamtam ki kmie ki kpa ba kim donkam shuh ban phah skul sha jngai namar katei ka shlem pule mynta kala don ïaka Arts, Commerce bad Science Stream.
Ïa katei ka Science Lab la wan ban plie paidbah mynta ka sngi da u Bah Sosthenes Sohtun MLA ka Jirang kum u kongsan haka jingdonlang ka Ruby Das DSEO ka Ri-Bhoi, Sister Molly Thomas Principal, ki father ki sister, ki nonghikai lem bad ki khynnah skul.
Naka liang u MLA haba kren hakane ka sngi u la ai iaka jingïaroh ïa ki bor pyniaid jong kane ka skul kaba la kiew stet bha haka rukom ai jing hikai iaki khynnah ki ba wan wad jingstad bad ka jingplie ia katei ka Science Lab kan long ka jingkyrkhu iaki khynnah pule Science ba kin pyndep ïakai course bad ki jinghikai jong ki katkum ka jingiaid jong ka por bad lehse lyngba ka jingplie ia katei ka Science Lab kan nang kyntiew ruh ïaka skul ban ai ka jingshakri bad ka jingnang jingstad sha ki khynnah pule.
Naka liang u MLA u la ai khublei ruh iaki khynnah pule ha ka Science Stream ki ba dang shu wan rung klas haka ne ka skul bad dei ruh ki khynnah pule Science ba nyngkong ha kaba kum ka skul kala pdiang burom hakane ka sngi ha ryngkat ka jingïaleh kmen naduh ki nonghikai ki sister bad ki khynnah skul jong katei ka skul.
