Tang hadien ba u drok u la sdang ban ioh bsuh khlieh haka thaiñ Eastern West Khasi Hills bala paw pyrthei ruh naka jingioh kem ka seng HYC ha kine ki khyndiat sngi ïa uwei u samla ha kawei ka shnong haka thaiñ Mawthadraishan u ba la kyrni ha ka jingdih drok, bakum ka seng kala ioh kurup ruh ïa u drok bad thyrnia injek haka miet jong ka 20 tarik mynta u bnai, naka liang ka seng hadien ka jingsyllok bad utei u samla ryngkat ki bahaiing kila mynjur ban phah sumar noh sha Rehabilitation Centre ba un lait na u kynjri ka jingkyrni dih drok.
Kum ban shu pynpaw ba naka liang ka seng HYC haka jingtreilang bad ki bahaiing kila ioh ban bat ïa u tei u samla bad hadien ka jingkurup drok bad thyrnia naka liang ka seng kala thang syndon ïaki.
Shuh shuh kaba kham sngewtynnad ka long ba utei u samla bala ioh bat da ka HYC u la pynpaw ruh ba u kwah ban kylla kaba mut bad im ka jingim kaba thymmai, bad dei mynta ka step naka liang ka seng HYC Mawthadraishan Circle hapoh ka jingïalam u Samla Shembor Langrin President bad ki dkhot ryngkat ki bahaiing hasem jong utei u samla kila mih ban leit phah sumar noh ïa utei u samla bala ngop haka jingkyrni drok sha Alive Again Foundation kaba dei ka jaka syllok bad sumar ïakiba kyrni drok haka jylla Assam.
Naka liang u Samla Shembor Langrin President ka HYC Mawthadraishan Circle haba kren sha ki lad pathai khubor u la pynpaw ïaka jingsngewkmen kaba khraw ba mynta ka sngi la ioh ban ïalam noh ïa utei u samla bala ngop ha u drok la bun snem sha jaka sumar ba un ioh ban pynthymmai pat ïala ka jingim kumba u la angnud ban kylla ba mut hadien ka jingsyllok bad ka seng.
Naka liang ka seng kala kyntu ruh ïaki nongïalam shnong, ki kynhun sengbhalang jong ka thaiñ ba kin long kiba husiar naka jingioh bsuh khlieh u drok kaba ap jingma ïaki khun samla bad kyntu ruh ïaka tnad Narcotic jong ka tnad pulit ba kan shimkhia ban tehlakam ïaka jingdon ki nongkhaii bad nongdih drok ha katei ka thaiñ.
U la pynpaw ruh ba kum ka seng kan nym shong kli kti ban rat diengkhong ïaki kam sniew ha katei ka thaiñ khamtam ban btin lynti ïaki khun samla ba kim dei ban jied ïaka lynti kaba bakla hynrei ban skhem ka jingmut jingpyrkhat ban ong em ïa u drok.
