U Lat ka Jylla u CH Vijayashankar hynne ka sngi u la pynkup burom iaka kynhun ialehkai Football jong ka skul Nongjri Presbyterian Higher Secondary School Ri-bhoi District.
Ia katei ka kynhun ialehkai la pynkup burom ha Raj Bhavan ka jaka sah u Lat ka jylla, ha kaba lyngba jong katei ka sngi ba la pynkup burom, la sakhi da ka jingdon u Conrad K. Sangma, Myntri Rangbah ka Jylla. U Bah Shakliar Warjri, Myntri ka tnat ki kam ialehkai ha ka jylla, u Bah Charles Marngar, MLA Mawhati lem bad shibun kiwei ki heh sorkar jylla.
La pynkup burom ia ka kynhun ialehkai U-15 ka skul Nongjri Presbyterian HSS, ka dei hadien ba ka la lah ban pynliem noh ia ka skul na Uttar Pradesh ban rah syndon iaka International Subroto Cup Cup 2024.
Haba kren ha kane ka sngi u Lat ka Jylla u CH Vijayashankar u la ong “Nga dap daka jingkmen namar ba ki khynnah ka Nongjri Presbyterian Higher Secondary School kila rah iaka nam lahduh hapoh ka Jylla jong nga”.
U Lat ka Jylla u la pynpaw baka jingpynkupburom iaka kynhun ialehkai kadei kum shi bynta ban iathuh iaka nam bad burom ba kila wanrah bad haka juh ka por ban nang pynshlur iaki ban nang trei shito shuh shuh.
Haba kyntu iaka Sorkar Jylla ban nang pyntreikam shuh shuh iaki skhim bad project ban kyntiew iaka kam lehkai hapdeng ki khynnah bad samla, u Lat ka Jylla u la ong “Kan bha iaka Sorkar ban khmih bad lum jingtip halor ka rukom treikam ki skul, ym tang haka liang pule puthi hynrei ha barob ki liang”.
Naka liang u Myntri Rangbah ka Jylla u Conrad K Sangma haba ai khublei ia u Lat ba ai ka jingithuh iaka kynhun Nongjri Presbyterian Higher Secondary School u la ong “Kane kadei ka sien ba nyngkong ba u Lat ka Jylla un pdiang burom iaka kynhun ba wanrah nam iaka Meghalaya haka International Subroto Cup Cup”.
U Conrad u la pyntip baka Sorkar Jylla kala shim khia ban kyntiew iaka kam ialehkai bad kala sdang ruh ban ai Scholarship iaki samla khnang ba kin lah ban nang trei shitom shuh shuh haka kam ialehkai.
“Ka Sorkar Jylla kala ai ka jingithuh ruh iaki Sports Association hapoh ka Jylla bad kala iarap ruh daki song pisa khnang ban iarap iaki ban nang kyntiew bad pyntbit shuh shuh iaki samla haki jingialehkai bapher bapher” u la ong.
