Ka 119 INF BN (TA) Assam ka la pynlong da ka ‘40-motorcycle rally’ lane ka jingiakop niah Kali Thuk thuk na Kenches Trace, Shillong sha Sohra bad wan phai biang sha Shillong shi bynta ka jingrakhe ia ka jingiaid lynti ba la dap 70 snem ka jingshakri lane ba la tip paidbah kum kata ka Platinum Jubilee. Ia kane ka jingiaid ki kali thuk thuk la pynlong ha ka 15 tarik u Nailur 2024 kaba long ym tang ban pyni paidbah ia ka jingiatylli ne ka jingiatrei kam jong kane ka Territorial Army hynrei ban pyni sha ka pyrthei ba ki don ka jingkitkhlieh ban shakri ruh na ka bynta ka bha ka miat jong ki paidbah babun balang.
Kane ka jingiakop niah kali thuk thuk ka long ka jingiakop kaba ki hap ban iaid lyngba ki lynti kiba khim bad kiba eh lyngba ki jaka bapher bapher bad ba la pynpaw da ki nongshim bynta kiba la tbit, ha kaba ki la sdang naduh kapor mynstep na Kenches Trace sha Sohra. Ki nongshim bynta ki hap ban iaid ruh lyngba ki jaka kiba itynnad bad ki surok kiba kham eh bad ha kaba khatduh ki la poi sha Sohra bad ban wan phai biang sha Shillong ba la pdiang burom biang ia ki ha Shillong.
Kane ka jingpynlong ia ka jingiakop niah thuk thuk, ka long ruh ban wan rah ia ka jingiadei paralok hapdeng ki nongshim bynta, ban kyntiew ia ka mynsiem jong ka jingieit ia ka jingialehkai bad ruh ban pynpaw ia ka rukom treikam ki shipai ha kane ka thain. Kane ka jingiakop niah thuk thuk ka long ruh shi bynta kum ka rynsan ban iakynduh bad ki nongshong shnong bad ban pynskhem ia ka jingiadei hapdeng ki shipai bad ki paidbah jong kane ka jylla.
U Colonel Devashis Nailk, Commanding Officer ka 119 Territorial Army, halor kane ka jingpynlon ia kane ka jingiakop niah thuk thuk, u la ai khublei sha baroh ki nongïashim bynta bad ki nongkyrshan.
“Kane ka jingpynlong ia ka jingiakop niah thuk thuk ka long ruh kum ka jingpynshisha ïa ka jingtbit bad ka jingaiti lut jong ki shipai jong ka Territorial Army ban shakri sha ki paidbah. Ngi sngew sarong ïa ka jingïalehkai jong ki bad ngi sngewkmen ïa ka jingïatreilang jong ki paidbah kaba kane ka jingiakop niah thuk thuk thuk ka la long kaba jop na ka bynta ban dang pynkhlain ia ka jingshakri ia ka shongsuk shongsain bad ka bha ka miat jong ki paidbah” u la ong.
Shuh shuh u la ong ruh ba ka 119 Territorial Army ka ai khublei ïa ki bor synshar shnong, ki nongtrei mon sngewbha, bad ki nongkyrshan kiba la noh synñiang sha ka jingjop jong kane ka jingiakop niah thuk thuj. Kane ka jingiakop niah thuk thuk ka long ka jingpynsngewthuh ia ka jingpyrshang jong ka Territorial Army ban dang iaid shakhmat na ka bynta ban ai ka jingshakri kaba bha tam sha ki paidbah, kaba dei ruh lyngba ka jingiakyrshan bad ka jingiasnoh kti lang jong ki paidbah, u la bynrap.
