Shillong, October 16: U Vice President ka ri India, u Jagdeep Dhankhar haba wan poi mynta ka sngi ha Nongbah Shillong u la shim bynta kum u kongsan ban buh ia u Mawnongrim jong ka Meghalaya Skill and Innovation Hub ha New Shillong, ha ka jingdon ryngkat u Lat ka jylla u C.H Vijayashankar, u myntri rangbah ka jylla u Conrad K. Sangma, ka myntri ka tnad ka koit ka khiah ka Dr. Ampareen Lyngdoh lem bad kiwei kiwei ki heh sorkar.
Ha kane ka sngi u Vice President ka ri India, u la plie paidbah ruh ia ka CM Business Catalyst; Student B-Plan Challenge bad ka IIM Shillong bad ruh la soi ia ka soskular hapdeng ka UNDP bad ka sorkar Meghalaya na ka bynta ban kyntiew ia ka seng kam seng jam (Entrepreneurship) ki khun samla.
Kumba la pynpaw ia ka Meghalaya Skill and Innovation Hub yn tei ha ka jaka kaba don 6.54 akar ha New Shillong bad ha ka jinglut kaba la kot sha ka Rs. 77.5 Cr. Kane ka Meghalaya Meghalaya Skill and Innovatoin Hub ka dei ka jaka kyrpang ban ai jinghikai ia ki khun samla na ka bynta ban kyntiew ha ka liang ka seng kam seng jam bad kiwei kiwei kiba long ka jingplie lad ia ki khun samla ban lah ban ieng ha la ki jong ki kjat.
Haba kren ha kane ka sngi, u Vice President ka ri india u Jagdeep Dhankhar, u la ai ka jingiaroh ia u myntri rangbah ka jylla Meghalaya u Conrad K. Sangma, halor shibun ki lad ki lynti kiba u la thaw ne pyntreikam na ka bynta ban kyntiew ia ki sap ki phong ki khun samla ka jylla la ka long ha kano kano ka sap kaba ki don ban kyrshan ia lade bad ban kyntiew ia ka ioh ka kot ka jylla.
U la ong ruh ia ka ophis ba heh tem ha ka ri India, ka ophis President ka ri India la bat da ka kynthei kaba dei hi ka jaid bynriew riewlum bad wat ha ka Meghalaya ruh ia ka kyrdan DGP la bat da ka kynthei kaba dei ka jad bynriew riewlum bad kine ki dei ki dak ki shin ba ka ri India kan dang lah ban kiew ha ki liang baroh jong ka jingiaid lynti ban poi sha ka thong.
U la pypaw ruh ba kane ka Skill and Innovation Hub kan ai jingmyntoi ha ki pateng ban sa wan ha ka liang ka seng kam seng jam lade. U kyrmen skhem ruh ba kino kino ki jingmih na kane ka jylla kan kyntiew ia ka jylla lyngba ka jingdon kane ka jaka ai jinghikai kyrpang ia ki samla.
U la ong ruh ba u Myntri rangbah ka ri u Narendra Modi u la plie ia ka jingkhang ban ai ka lad ka lynti ia ki khun sala lyngba ki prokram bapher bapher. U la pyntip ruh ba 60,000 klur la pruid dak na ka bynta ban plie lad plie lynti ia ki 5 lak ngut ki samla ha ka liang ka seng kam seng jam la jong hapoh kane ka san snem ban wan.
Shuh shuh, u la ong, “ Ka jingpynkup bor ia ki khun samla ka ri, ka dei kawei na ka kam kaba khraw ban kyntiew ia ka ioh ka kot jong ka ri bad ia kane donkam ban pyntreikam hok kumba la mang da kasorkar” u la bynrap.
