Shillong, Risaw 29: U Myntri ka Tnat Tourism u Bah Paul Lyngdoh u la pyntip baka tnat kala iateh bad ka NIT ban ai jinghikai iaki 70 ngut ki samla, ki ban shah thung kum ki Tourism Buddy.
Haba kren sha ki lad pathai khubor u Bah Paul u la pyntip ba ka thong ban pyntreikam daka ‘Tourism Buddy Scheme” kadei naka bynta ban pynsuk ia ki nongwan shangkai haba ki leit kai sha kylleng ki jaka jngohkai hapoh Meghalaya.
U Bah Paul u la iathuh ba haki khyndiat sngi ban wan, ka NIT kan ai jinghikai iaki 70 ngut ki samla haka ktien ka thylliej, ka akor bad kiwei ki jingdonkam ban pyniadei bad iajan bad ki nongwan shangkai.
“Ka NIT kan ai jinghikai ruh iaki 70 ki samla ki (Tourism Buddy) ba kin peit ia ka kam pahara, ialam lynti ia ki nongwan shangkai bad ruh ban pynlong ia ki nongwan shangkai ba kin sngew aram ba kin sah ha Shillong bad ha kiwei ki jaka jong ka Jylla” la ong u Bah Paul.
U Bah Paul u la ong ba ka kamram jong ki Tourism Buddy kin long kum ki nonglam lynti, ki nongiarap, ki nongpynkylla ktien bad kin iarap ia ki briew, kiba lah ban jah lynti shane shatai.
U la ong ka tnat Tourism kan iatreilang bad ki Dorbar Shnong haki jaka ba bun ki nongwan shangkai kum ha Laitlum, Ward’s Lake, Krem Mawsmai, krem Arwah, Nohkalikai, Dainthlen, Mawlynnong, Mawkdok, Golflink, Shnongpdeng, Krangsuri bad kiwei kiwei.
