Nongpoh, Naiwieng 07: Ka long shisha ka sngi kaba kmen ia ka Raitong Government Lower Primary School, ha kaba mynta ka sngi u Myntri ka tnad Pule puthi, u Rakkam A. Sangma u la kular syndon ban ai da ka skul building ha ka jingleiti shim bynta ban rakhe ia ka platinum jubilee ba katei ka skul ka la kynjoh sha ka jingiaid lynti kaba 75 snem naduh ba la seng ha u snem 1949 na ka bynta ban kyntiew ia ka jingnang jingstad ki khynnah ha katei ka thain Raitong ha Ri Bhoi District.
Ha kane ka sngi, u Myntri ka tnad pule puthi, u Rakkam A. Sangma nalor ka jingkular ban ai da ka skul building ia ka Raitong Government LP School, u la kular ruh ban ai skul building sa ki 6 tylli kiwei pat ki skul ha Mawhati Constituency bad kumjuh ruh ba ka sorkar jylla kan sa pynbha lut ia baroh ki skul sorkar kiba don ha ka jylla na ka bynta ban kyntiew ia ka jingnang jingstad kiba long katkum ka juk ba mynta.
U Rakkam A. Sangma u la kyntu ruh ban don lang ka jingkitkhlieh naduh ki kmie ki kpa, ki nonghikai bad ki khynnah skul na ka bynta ban poi ki samla sha ka thong kaba ki angnud ha ka jingim. U la pynshlur ruh ia ki khynnah skul ba ki dei ban nang ban kren shibun ki jaid ktien khnang ba kin lah ban poi ha kylleng ki ri ka pyrthei hadien ba ki la dep ia ki jingpule. Kumba long mynta haduh 25 ngut ki Nurse ki la leit ban trei sha Japan ba la iarap ruh da ka sorkar bad kane ka long kawei na ka lad ban ioh kam ioh jam.
Ha kane ka sngi, na ka liang u MLA ka Mawhati, u Bah Charles Marngar ruh u la ai khublei kyrpang ia ka Raitong Government LP School kaba la kynjoh sha ka jingiaid lynti kaba 75 snem ban ai ia ka jingnang jingstad sha ki khynnah katei ka thain bad u kyrmen skhem ruh ba kane ka skul kan dang iai paw kum kawei na ka skul kaba paw lyngba ka jingkitkhlieh lang naduh ki nonghikai, ki kmie ki kpa bad ruh ki khynnah skul.
Shuh shuh, u la ong ba kum u MLA u don shibun ki jingphohsniew ban wan rah ia kata ka jingkylla ha Mawhati Constituency khamtam kum ka College bad ki Higher secondary ban shimti da ka sorkar, namar katei ka dong bad ka thain ka dang donkam ia ki skul ne ki College kiba biang khnang ba ki khun samla kin ioh lad ban pyndep ia ki jingpule kiba shajrong bad dei tang ka jingnang jingstad kaba lah ban wan rah ia ka jingkylla ha baroh ki liang.
Shuh shuh, u la khot ruh ban don ka jingiatrei lang jong ki paidbah ha kaba wan rah shibun ki kam pynroi ha katei ka Constituency bad kum u Nongmihkhmat u la pyrshang ban leh shibun ki kam ban pynsngew sha ka sorkar bad lada ki paidbah pat kim ai ka jingiatrei lang ka long kaba eh ban wan rah ia kajingkylla ne ban saindur ia kane ka Constituency kaba dang sahdien ha baroh ki liang, u la bynrap.
Ha kane ka sngi la pule ruh ia ka histori ka jingiaid lynti katei ka skul kaba la seng naduh u snem 1949 bad dei tang ka jingiatrei lang na baroh ki liang ba kane ka skul ka dang ieng haduh mynta ban ai ia ka jingnang jingstad sha ki khynnah ha katei ka thain.
Ha kane ka sngi ba la shim bynta da u Myntri ka tnad pule puthi, u Rakkam A. Sangma la don ryngkat ruh u MLA ka Mawhati u Bah Charles Marngar kum u symbut kongsan, ka Additional deputy commissioner ka Ri Bhoi, ka Kong Brenda L. Pakyntein, ki ophisar na ka tnad pule puthi ka Ri Bhoi, ki Rangbah shnong, ki kmie ki kpa, ki nonghikai bad ki khynnah skul.
La pynphuh pynphieng ruh ha kane ka sngi, da ki jingwai, ki jingshad bad ki jinglehkai bapher bapher ki khynnah skul ban pynlong ia kane ka sngi rakhe 75 snem ka skul ba kan long kaba phuh ba phieng bad ka ban sah jingkynmaw pateng la pateng halor ka jingdon kane ka skulk aba ieng ban ai jingnang jingstad ia ki heprit ha katei ka thain.
Shuh shuh, ha kane ka sngi la pynlait paidbah ruh ia ka Souvenir bad ruh ia u maw sah jingkynmaw jong ka jingrakhe ia ka platinum jubilee ka Raitong Govt. LP School da u Myntri u Rakkam A. Sangma bad ruh u MLA u Bah Charles Marngar ryngkat ki ophisar kiba la sakhi ha kane ka sngi.
