Nongpoh, Naiwieng 11: Ki ophisar na ka Riat Khwan Beat House ha ka jingdon lang ki riew rangbah na ka shnong Lumdatikhla bad Lumsohpieng ba hap ha Bhoirymbong mynta ka sngi ki la leit ban jurip ia ka khlaw Raid jong ka Bhoirymbong Pyllun, kaba dei hadien ka jingdon ki riew shim kabu kiba la pom pathar ia ki deing ha katei ka khlaw Raid.
Ha kane ka jingleit jurip la ialam da u Bah S. Pynrope, Beat Forest Officer bad la don ryngkat ruh u Bah Aibor Jyrwa na ka shnong Lumsohpieng, u Bah Tynshain Makri na ka Shnong Lumdaitkhla bad ryngkat ka jingdon lang kiwei kiwei ki riew rangbah na ka shnong Lumdaitkhla bad Lumsohpieng.
Ha kane ka jingleit jurip la lap shisha ba ki don ki jingpom pathar ia ki dieng ha katei ka khlaw raid bad ki la ioh ruh ban kurup ia ki dieng ba la dep ban pom da ki phew tynrai, ha kaba kitei ki ophisar na ka tnad Forest ki la leh ia kaba donkam katkum ki kyndon jong ka ain.
Haba kren sha ki lad pathai khubor, u Bah Aibor Jyrwa, u la ong ba kum ki nongshong shnong, ki sngewkhia eh ban ïohi ba ki riew shim kabu, kiba la nud ban pom pathar ia ki dieng hapoh katei ka khlaw Raid bad kane ka la long shisha ka jingpynjor ia ki khlaw ki btap jong ka shnong.
Ha kawei pat ka bynta, u Bah Aibor Jyrwa, u la ai ka jingiaroh ia ka tnat khlaw, kiba la shimkhia ban wan jurip da lade, khnang ban lap ia ka jingshisha bad ha kajuh por ki la kyrpad ruh ia ka tnad khlaw ba kin shimkhia na ka bynta ban pyngngat ha ki kyndon ain ia kito ki briew kiba don kti ha kane ka kam ban pom pathar ia ki dieng.
