Nongpoh, Naiwieng 11: Ban pynsuk bad ban iada ia ki khynnah skul ka Mynken Christian Higher Secondary School bad ki paidbah, ki nongialam ka FKJGP, North Khasi Hills District, ki la leit ban aiti da ka sem ap kali kaba la pynshna kyrpang da ka seng.
Hadien ba la dep pynshna bha, ia kane ka sem ap kali la leit ban plie da u Samla Kitboklang Nongphlang, Vice President ka FKJGP, Sengkmie ha ka jingiadonlang ruh u Bah Luistar Lyngdoh, President ka North Khasi Hills District, Bah Shanlang Diengdoh, General Secretary.
La sakhi lang ha kane ka sngi, da u Bah Everlasting Pyngrope, Principal ka Mynken Christian HSS, ki nonghikai bad khynnah skul lem bad ki riew rangbah ka thaiñ.
Na ka liang u Babu Everlasting Pyngrope, u la pynpaw ia ka jingsngewkmen bad ban ai jingiaroh halor ka jingiohi jngai jong ki nongialam ka FKJGP kiba la shim ka jingkitkhlieh ban pyntei da kane ka sem ap kali ban pynmyntoi ia ki khynnah skul bad ki paidbah ban rieh slap bad shongthait haba ki ap kali ne skul bus da kaba kyrkhu kyrdoh ruh ia ki nongialam ka FKJGP ba kin nang lah ban ai ka jingshakri paidbah kaba janai na kawei ka por sha kawei pat.
U samla Kitboklang Nongphlang, kum u nongialam ka FKJGP u la pynpaw ba ka seng hi ka dap da ka jingkmen ban ioh shakri ia ki paidbah ha kum kine ki bynta kiban pynmyntoi ia ki paidbah bad khynnah skul bad kin nang iai bteng ban ai ka jingshakri kaba janai na ka por sha ka por.
