Nongpoh, Naiwieng 15: Ka skul St. Peter’s Higher Secondary School, kaba don ha shnong Umkadhor Ri Bhoi Sepngi, kaba dei ruh kawei na ki skul kaba la paw bha ha katei ka thain, mynta la sngi ka la ioh ban pdiang ia kawei ka skul bus, khnang ba kan ioh ban leit shaw ne leit buh ia ki khynnah skul, kiba la kham jngai na katei ka skul.
Ia katei ka skul bus kaba la ioh lyngba ka Chief Minister Special Development Fund (CMSDF), la leit ban pyllait paidbah mynta ka sngi da u MLA Jirang u Bah Sosthenes Sohtun, ha ryngkat ka jingdon u Phadar Micheal Sun, Parish Priest ka Umkadhor Parish, ki nonghikai, ki khynnah skul lem bad kiwei.
Haba iadei bad katei ka sngi ba la ioh ban pyllait paidbah ia katei ka skul bus, na ka liang u MLA bad kumjuh ruh na ka liang ki nongpyniaid ka skul bad ki nonghikai, ki la ai ka jingkhublei kaba kyrpang eh ia ka sorkar bad khamtam eh ia u Conrad K. Sangma, kum u Myntri Rangbah, uba la sngap ia ka jingkyrpad halor ka jingdonkam jong katei ka skul.
Katba na ka liang ki nonghikai skul, ki la ai jingiaroh ia u Bah Sosthenes Sohtun, kum u MLA Jirang, u la shimkhia ban pynkren lem halor katei ka jingdonkam ka skul tad haduh ba la ioh ia katei ka skul bus bad kaba la long shisha ka jingmyntoi kaba khraw eh na katei ka skul bad khamtam eh na bynta ki khynnah kiba la kham jngai na katei ka skul ban kin ioh ban pyndonkam lyngba katei ka skul bus.
