Nongpoh, Naiwieng 15:U Bah Sosthenes Sohtun, MLA Jirang ha ryngkat u Raja Brahma, Project Director Ri Bhoi, mynta ka sngi, ki la leit ban sam Work Order kaba T. 17 lak tam kawei sha ki 14 tylli ki shnong kiba don ha Ri Bhoi Sepngi bad kiba hap ha Jirang Constituency.
Kitei ki Work Order kaba la sam sha kitei ki shnong, ki dei na bynta ban tei ia ki iing Children Adolescents & Digital Infrastructure, ne kita ki iing ki ban sa ai jinghikai kaba kyrpang eh na bynta ki khynnah nongkyndong, khnang ba kin long iaryngkat lem kumba long ki khynnah kiba sah ha sor bad kiba la ioh ia kata ka jinghikai kaba biang eh, kiba iaryngkat katkum ka juk kaba mynta.
Kumba ka long mynta, ban tei ia kitei ki Children Adolescents & Digital Infrastructure, ia ka Work Order la pyllait pisa tang T. 17, 19,958, kata tang na bynta ban tei ia ka Building bad hadien kata kan pyllait ia ka pisa kaba T. 4 lak na bynta ban thied pat ia ki tiar ki tar kiba donkam.
Haba kren ha katei ka sngi, na ka liang u Bah Sosthenes Sohtun, kumjuh u Raja Brahma, ki la kyntu ia kitei kiba la ioh pdiang ia kitei ki Work Order, ba ki dei ban pyntrei beit kumba la btah ia ki ban trei, khnang ba ka long ka jingmyntoi ia ki khynnah kiba dei shisha ban ioh jingmyntoi.
Nalorkata, ki la pynpaw ruh ia ka jingsngew kmen ban pyntip ba ki shnong kiba hap ha Jirang Constituency, ki dei kiba la ioh nyngkong eh ia katei ka skim, ia kaba la pynmang kyrpang da ka sorkar kmie bad sorkar jylla, ha ryngkat ka jingiatreilang u MLA bad ophis u Deputy Commissioner ka Ri Bhoi.
Ia ka prokram ban sam ia kitei ki Work Order la pynlong ha ophis u BDO Jirang C&RD Block, ha kaba la sakhi da ka jingdon u Dr. P. Hajong, BDO ka Jirang C&RD Block, u Bah Lester Nongphlang, Chairman ka C&RD Block Jirang lem bad shibun ki rangbah shnong na katei ka thain.
