Nongpoh, Naiwieng 15: Ki Nongkitkam jong ka Party National People Party NPP Umsning Block mynta ka sngi ki la pynlong ïaka program kaba kyrpang ban pdiang burom ïa u Dr. Celestine Lyngdoh u MLA ka Umsning sha ka ïing ka sem jong NPP Umsning Block bad ïa katei ka program pdiang burom la pynlong ha ka Shnong Sohkyndur, Ribhoi District.
Ha kane ka sngi pdiang burom ïa u Dr. Celestine Lyngdoh daki nongkitkam jong ka NPP Umsning Block la ïa donlang da u Bah Prestone Tynsong, U Symbud myntri rangbah ka jylla hakaba la ïa donlang ruh da u bah Hamletson Dohling Working President State NPP, Bah H Shangpliang Spoke Person, bah Jayson S Mawlong, President NPP Umsning Block, Kong Macdalyne S Mawlong MDC Umsning, Bah Angelstar Khonghat President NPYF Umsning Block lem bad kiwei kiwei ki nongïalam kiba ha khmat jong ka NPP
Haba kren ha katei ka jingïalang, u Bah Prestone Tynsong u la ïathuh ba ka jingïaleh ban khwai ïa u Dr. Bom ka la slem bad dei ha kine ki bnai kiba la dep kane jingthrang jong ki ka la urlong. Hakaba u bah Prestone u la ïathuh ba kaei kaba pynsngewtynnad ïa ki kum ki nongïalam jong ka NPP ka long ba naka liang u Dr. Bom kam shym la don kano kano ka kyndon lane k jingdawa ha shwa ba un wan ban pyniasoh bad ka Party.
Shuh shuh u bah Prestone Tynsong u la pynpaw ïa ka jingkyrmen ba hapoh ka Umsning Constituency ka Party NPP kan sa nang kiew shuh shuh bad kumjuh ruh ha Mawhati Constituency da kaba bynrap ruh ba ba naka liang ki nongkitkam ki dei pat ban nang ïai treishitom bad ban nang ïa ïaid shaduh ki shnong khnang ba ngin dang lah ban ïoh shuh shuh iaki jingshaniah naki paidbah.
