Nongpoh, Naiwieng 26: Nalor ka kam kaba ki shakri ban wan rah ia ka shongsuk shongsain bad ban pynduhjaid ia ki kam sniew kam smeh ha ka imlang ka sahlang, ka tnad Pulit na Ri Bhoi ka la plie ruh sa da ka jaka ialehkai GYM ha ophis u Superintendent of Police ha Nongpoh ban ailad ia ki para Pulit ban kyllan met na ka bynta ka jingkoit ka jingkhiah.
Ia kane ka jaka ialehkai GYM ka tnad Pulit ha Ri Bhoi la ailad ruh ban plie paidbah ha ka 25 tarik u Naiweing 2024 da uwei u heh constable u Shiv Bachan Singh bad la sakhi lang ruh da ka jingdon lang u Superintendent of Police ka Ri Bhoi u Jagpal Singh Dhanoa lem bad kiwei kiwei ki heh ophisar ka tnad Pulit na Ri Bhoi.
Kumba la pynpaw da ka tnad Pulit, kane ka GYM ka dei kaba la plie lyngba ka jingiasynniang lang ki pulit ophisar bad kiwei kiwei ki para pulit, ha kaba nalor ka kam kaba ki shakri kin ai por ruh ban kyllan met ia lade na ka bynta ka jingkoit jingkhiah.
Kumba la pynpaw, lada ki pulit ki long kiba koit ba khiah, kin lah ruh ban ai ka jingshakri kaba paka ban pynneh ia ka shongsuk shhongsain bad ban ia khun pyrshah ia kino kino ki kam sniew kiba ktah ia ka shongsuk shongsain ki paidbah bad dei tang lada ki bor pulit ki long kiba koit ba khiah ngin lah ruh ban pynthikna ia ka shongsuk shongsain jong ka lawei ka jylla bad ka ri hi baroh kawei.
