New Delhi, Naiwieng 28: Ka jylla Meghalaya lyngba ka Meghalaya Pavilion ka la ioh ban rah ia ka khusnam ba la tip kum ka Silver Medal Award ha ka 43rd India International Trade Fair, 2024, ba la pynlong da ka India Trade Promotion Organization napdeng ki jylla bapher bapher kiba la wan ban shim bynta ha kane ka iew ia ia die ia thied, kaba dei lyngba ka jinglah ban pynpaw ia ki mar ki mata kiba la pyni paidbah ha kane ka iew ia die ia thied.
Ia kane ka jingsam ia ki khusam la pynlong ha ka 27 tarik u Naiwieng 2024 ha Bharat Mandapam, New Delhi.
Ia katei ka khusnam la leit ban pdiang da u W. G. Momin, uba dei u Meghalaya Pavilion Director ban mih khmat ia ka ophis jong ka Directorate of Information and Public Relations, ha ka jingdon ryngkat u Bah S.L Mawlong, Public Relations Officer, u Bah B.S Sun, uba dei u Functional Manager, Nongstoin bad A.D.Shira, Functional Manager, Ampati, Commerce and Industries Department.
Ia kaetei ka khusnamm la sam da u Pradeep Singh Kharola, Chairman and Managing Director, ITPO, uba la shim ia ka bynta kum u kongsan ha kane ka jingsam ia ki khusnam.
Kum ban pynpaw, kane ka India International Trade Fair (IITF) la pynlong da ka India Trade Promotion Organization (ITPO) naduh ka 14 tarik u Naiwieng haduh ka 27 tarik u Naiwieng 2024, halor ka phang “ Viksit Bharat @2047”, kaba don ka jingiadei bad ka thong ka sorkar ban kyntiew ia ka ri bad la pynpaw ruh halor ka jingiaid shaphrang ka ri ban dang kiew ha baroh ki liang.
Ha kane ka trade fair la wan ban shim bynta da ki jylla bapher bapher ka ri india, ki Union territories, ki Private Enterprise na kylleng ka ri India.
Ki tnad sorkar kiba la mihkhmat na ka jylla Meghalaya sha katei ka Trade Fair ki kynthup ia ka tnad Tourism, Commerce and Industries, Meghalayan Age Limited, bad na ka Directorate of Information and Public Relations kum kata ka ophis kaba la lamkhmat.
