Nongpoh, Naiwieng 28: Ka Public Accounts Committee ka Meghalaya Legislative Assembly mynta ka sngi lyngba ki dkhot jongka, ka la hiar sha Ri Bhoi District ban jurip ia ka Modern & Hygienic Fish Market kaba don ha ka shnong Saiden.
Ha kane ka jinghiar jurip la sakhi la ialam da u Bah Charles Pyngrope, Chairman ka Public Accounts Committee bad kynthup ki dkhot ba la don lang u Bah Lakmen Rymbui, u Bah Gabin Mylliemngap, u Rupert Momin, u Bah Ardent Miller Basaiawmoit bad kynthup ki ophisar na ka tnad Fishery bad na ka District Ri Bhoi.
Lyngba jong kane ka sngi, hadien ka jingjurip ia katei ka Modern Fish Market, ka Public Accounts Committee ka la pynlong ruh ia ka jingialang ban ia tai halor shibun ki kam pynroi kiba pyntreikam ha kane ka District.
Ki katto katne kiba ka Committee ka la iathir bad ia kren ki kynthup ia ki kam pynroi ha ka agriculture, horticulture, veterinary, education, health bad kiwei kiwei ki tnad sorkar kiba don ha kane ka District.
Haba la pyrshang ban pynshia halor kane ka jingwan jurip ha Ri Bhoi, u Chairman bad ki dkhot katei ka Committee ki la kyntait ban kren sha ki lad pathai khubor bad ki la pyntip ba kaei ka kaiphod ba ki ioh lum na kane ka jingwan jurip kin sa pyntip sha ki bor ba halor jong ka sorkar ba dei ban peit ia kane ka kam.
Kum ban pynkynmaw, ia kane ka Modern Hygienic Fish Market kaba don ha Saiden la plie ha u snem 2018 bad la mang tyngka haduh haka jinglut kaba la poi sha ka 1.6 Klur bala bei tyngka da ka National Fisheries Development Board jong ka sorkar India ryngkat bad ka sorkar jylla lyngba ka Aquaculture Mission, hynrei kumba long haduh mynta kane ka Moden Hygienic Fish Market kam pat treikam satia bad ka la shu sahkut khongreng khlem da lah ban pyntreikam satia katkum ka jingangnud ka sorkar.
