Nongpoh, Naiwieng 29: Ka North East Police Academy (NEPA) mynta ka sngi hapdeng ka jingphuh jingphieng ka la pynlong ia ka passing out parade ne ka jingpynkup burom na ka bynta ka 53rd batch basic course trainees, ha kaba u myntri rangbah ka jylla u Conrad K. Sangma u la wan ban shim bynta kum u kongsan ha kane ka passing out parade bad ruh ban pynkup burom ia ki pulit ophisar kiba la pyndep ia ka jingshah ai jinghikai ha katei ka shlem ai jinghikai na ka bynta ki Pulit.
Nalor u myntri rangbah uba la shim bynta ha kane ka passing out parade la sakhi lang ruh da ka jingdon lang u Dr. Celestine Lyngdoh MLA ka Umsning, u Director ka NEPA u Danesh Rana, ki heh pulit ophisar, kiba haing ha sem bad kynthup kitei ki pulit ophisar kiba la pyndep ia katei ka jingshai ai jinghikai ha katei ka slem ban ai jinghikai kyprang ia ki pulit.
Na ka bynta kane ka 53rd batch basic course trainees, ki don haduh 90 ngut ki pulit ophisar kiba la pyndep ia kane ka jingai jinghikai kyrpang bab kynthup 27 ngut ki dei ki Deputy Superintendents of Police (Probationary), 2 ngut ki Pulit Inspectors, 56 ngut ki Pulit Sub-Inspectors (Cadet), bad 5 Assistant Sub-Inspectors (Cadet) kiba dei na ki jylla bapher bapher ka thain Shatei Lam Mihngi ka ri Dndia. Na ka jylla Meghalaya ki don 46 ngut ki trainees, Manipur 19, Assam 14, bad Nagaland 11.
Haba kren ha kane ka sngi kum u kongsan, u Myntri rangbah ka jylla u Conrad K. Sangma, u la ai ka jingiaroh naduh ba la don ka North East Police Academy ba la sdang naduh u snem 1978, ba kane ka shlem ai jinghikai ia ki pulit ophisar ka la ai jingmyntoi shibun eh ym tang ia ka jylla Meghalaya bad ia ki jylla bapher bapher hapoh ka thain Shatei Lam Mihngi ka ri India.
U la ong ruh ha ka jingiaid lynti ba 46 snem ka NEPA ka la dep ban ai jinghikai haduh 36,000 ngut ki Pulit ophisar kaba long ka jingshah jingkynmaw ha ka jingiaid lynti bad lyngba ka jingdon kane ka shlem ai jinghikai ia ki pulit ka iarap ban don kata ka akor ka burom, ka jingiatylli bad ka jingthmu kaba kyrpang ba ki pulit ophisar kiba la ioh ai jinghikai na kane ka shlem ki dei ban don ka jingsngewkhia kaba kyrpang ban iada ia la ka jylla bad ka ri.
U la ban khia ruh halor ka jingdonkam ban don kata ka mynsiem sngewrit, ka mynsiem jong ka jingiaburom lang bad ban burom ia kita ki nongialam ba kum ki Pulit ophisar ki dei ban don ia kata ka mynsiem jong ka jingiaishah na ka bynta ban shakri hok ia ki paidbah bad ruh ban ai ia ka jingshakri kaba hok ia ki paidbah.
Shuh shuh, ha kane ka snig, na ka liang u Myntri rangbah ka jylla, u Conrad K. Sangma u la kular ruh ba ka sorkar jylla kan ai ka jingkyrshan bad ka jingiatrei lang bad ka NEPA, kiba kynthup ia ki jingdonkam bapher bapher ban saindur ia ki jingkiew shaphrang katie ka shlem ai jinghikai bad ruh ha kawei ka bynta u la ai khublei kyrpang ia baroh kito ki pulit ophisar kiba la pyndep ia ki lad shah ai jinghikai bapher bapher shuwa ba kin leit sha u paidbah ban ai ka jingshakri kaba paka tam kumba ki la ioh ia kata ka jinghikai na kane ka shlem ai jinghikai jong ka NEPA, u la bynrap.
