Nongpoh, Naiwieng: Ki nongialam ka United Democratic Party (UDP) mynta ka sngi ki la hiar sha Umroi ryngkat ka jingkyrmen skhem ba ka party UDP kan dang khlain, kaba dei hadien ba ki nongialam ka NPP, TMC bad Congress party ki la wan ban pyniasoh sha ka sem ka UDP shuwa ban poi sha ka election MDC ka Khasi Hills Autonomous District Council ha rilum Khasi Jaintia.
Haba pdiang ia kitei ki nongialam na kiwei ki party bad kiba la wan ban pyniasoh ia lade sha ka party UDP mynta ka sngi ha Madan Umroi la pdiang burom da ka jingdon lang ar ngut ki MLA kiba kynthup ia u Bah Mayraldborn Syiem bad Bah Renikton L. Tongkhar bad la don lang kiwei ki nongialam UDP ba kynthup iau Dr. Jemino Mawthoh, General Secretary ka UDP, arngut ki MDC kiba kynthup ia u Bah Balajied Ranee bad u Bah Titosswell Chyne, lem bad kiwei kiwei ki nongialam ka UDP na state bad na Ri Bhoi District.
Ha kane ka sngi, kumba yn sa jam sha ka election MDC, ka don ruh ka jingpynithuh paidbah ia ka Samla Naphishisha Marwein, ka samla ba dang 26 snem ka rta na ka shnong Khweng bad kaba la thmu ban mih shakhmat ha kane ka Ilekshon MDC ban wan bad kaba la kwah ban aireng na ka Party UDP na Umroi Constituency.
Haba kren ha kane ka jingialang, ki nongialam ka UDP ba kynthup naduh ki MLA bad MDC ki la pynpaw iaka mynsiem jong ka jingkmen halor kane ka jingwan pyniasoh kitei ki nongialam ka NPP, Congress bad TMC, kaba long shi bynta ban pynkhlain ia ka party UDP ha Umroi Constituency.
Kumba la pynpaw hakba kren halor ka ticket ka party na ka UDP ha kane ka election MDC ban sa wan, la thikna ba ka sala Naphishisha Marwein, kan sa long ka kyrtong ka UDP na Umroi Constituency bad ki nongialam ki khmih lynti ruh ba ka UDP kan dang khlain bor da ka jingwan pyniaosh kiwei kiwei ki nongialam na kiwei ki party bad ruh ka jingiatrei shitrhem ki nongialam ka UDP ha katei ka Constituency.
