Nongpoh, Nohprah 3: Ka Ophis jong ka District Social Welfare Officer Ri Bhoi District ha ka jingtrei lang bad ka District Legel Service Authority Ri Bhoi District Nongpoh, mynta ka sngi 3 tarik Naiweing, ka la rakhe burom ïa ka sngi ba kyrpang jong kito kiba don jing duna ha ki dkhot met lane ka ‘International Day for Persons With Disability halor ka phang “Amplifying the Leadership of persons with disabilities for an inclusive and sustainable future”.
Ïa kane prokram jingrakhe, la pynlong ha Patharkhmah Government Higher Secondary School ha kaba la wan ban donbynta lang da u Bah Sosthenes Sohtun, MLA Jirang kum u kongsan ha ka jingdon ryngkat u P. Hajong, BDO ka Jirang C&RD Block, ka Kong N.F Sun District Social Welfare Officer Ri Bhoi District District, ka Dr K.Lyngdoh Medical & Health Officer CHC Patharkhmah, u Bah P. Thyngkeiew Sordar Patharkhmah, u Bah Lewen Bey Assistant Legal Aid Defense Counsel, Nongpoh, ka Kong Joinmary Sakra Physiotherapy Civil Hospital, Nongpoh lem bad Kiwei kiwei.
Haba ai jingkren ha kane ka sngi na ka Liang u Bah Sosthenes Sohtun kum u kongsan, u la ai khublei ïa ka ophis jong ka District Social Welfare Officer ka Ri Bhoi District, ba ka la lah ban pynlong ïa ka jingrakhe ïa kane ka sngi kaba kyrpang na ka bynta ki jong kito kiba don jing duna ha ki dkhot met, U la kyntu ïa baroh kiba la sakhi lang ïa kane ka prokram, ba kin peit bad ithuh ïa ki nongshong shnong kiba don jingduna ha ki dkhot met, lyngba ki sap ba kyrpang jong ki ym lyngba ki jingduna kiba ki don bad u la ong ruh ba ki long mar kajuh hakhmat u Blei.
Ha kane ka sngi la pynlong ruh ïa ka Free Free medical check-up, bad la ïoh ruh ban pynlong ïa ki jingïalehkai bapher bapher na ka bynta ki nongshong shnong jong kane thaiñ kiba don jingduna ha ki dkhot met, bad na ka Liang ki Nongpyniaid ki la sam ruh ia ki khusnam sha kiba don jingduna ha ki dkhot met kiba la wan ïashimbynta ha kane ka prokram.
