Shillong, Nohprah 04: U Myntri rangbah ka jylla, u Conrad K. Sangma mynta ka sngi u la plie paidbah ia u Mawnongrim na ka bynta ban shan ia ka Shillong Ropeway Project, kaba dei ruh u maw nongrim ba la wan buh da ka President ka ri India ka Droupadi Murmu ha ka 16 tarik u Kyllalyngkot 2024 mynta u snem bad bad ba la ia don lang ruh u Myntri ka tnad Tourism u Bah Paul Lyngdoh.
Ia u mawnongrim kum ka dak ka jingsdang ban pyntrei ia kane ka ropeway project la buh ia u mawnongrim ha ka jaka ban tei ia kane ka project kata ha Shillong Peak View Point.
Ha kane ka sngi, u myntri rangbah ka jylla, u la aiti ruh ia ka shithi ba la pdiang na ka bynta ban shna ia kane ka ropeway sha ka Kompani ba la tip kum ka KYC International Limited – Tantia Constructioin Limited JV naka bynta ban sdang noh ia kane ka kam kaba la mang tyngka haduh T. 175 klur.
Lah ban ong ruh, ba kane ka dei ka sien kaba nyngkong ia ka jylla Meghalaya ba kan pyndonkam ia kine ki ropeway bad ban ia trei lang bad kawei ka Kompani ba la tip kum ka French Based company POMA, kaba don ka bynta kaba hakhmat ban pynbiang ia ki tiar ki tar na ka bynta ban shna ia katei ka ropeway. Kane ka dei ruh shi bynta ban kyntiew ia ki kam jngohkai pyrthei hapoh ka jylla Meghalaya.
Na ka liang u Myntri rangbah, ha kae ka sngi, u la aiti ruh ia ka song pisa kaba dei ha ka wat kaba ark aba long T. 1.5 klur sha u Glanding Lyngdoh, general Secretary ka Riat Laban Dorbar Pyllung bad kaba long ruh shi bynta na ka bynta ka jinglutksan ia ka jaka ba la shim da ka so rkar kaba long T. 3 klur.
Haba kren ha kane ka sngi, u Myntri rangbah u Conrad K. Sangma u la iaroh ia baroh kiba don bynta ha kane ka kam ba ki dei ban pynbaing ia ki kot ki sla kiba donkam khnang ban lah ban sdang noh ia kane ka kam ha ka por kaba biang.
“Ki don katto katne ki jingeh ha kaba ia dei bad ki kam shim jaka, ki jingai bor bad ruh ban shna ia kata ka Meghalaya Ropeway Development Authority, na ka bynta ba ki hap ban leh ha kata ka rukom kaba paka bad ban ioh long ka jingshngain bad ba kan nym buh jingma ia ki paidbah. kane ka jingangnud ka dei kaba la saw snem ei ei bad mynta la ioh ban kheit ia u soh” ong u Myntri rangbah u Conrad K. Sangma.
U la ai khublei ruh ia ka Raid Laban Dorbar Shnong Pyllun na ka bynta ka jingiatrei lang bad ka sorkar, namar kane ka surok tyllai (Ropeway) kan iaid lyngba ka Laban, Madan Laban, Upper Shillong, Lower Lumparing, Lum Kjatshai, Oxford Hills bad Rngi Shillong.
Shuh shuh, u la ong ruh ba kane ka ropeway ka long kaba donkam ruh ha ki jaka sorkar bad ka long ruh ka lad ka lynti ban pynduna ia ka jingdheng kali hapoh ka nongbah Shillong.
Kiwei kiwei kiba la I adon lang ha kane ka sngi ki kynthup ia u Myntri ka tnad Tourism u Bah Paul Lyngdoh, u Chairman ka Meghalaya Tourism Development Corporation, u Bah Sanbor Shullai, u Chief Secretary, D. P. Wahlang, Commissioner & Secretary Tourism, Dr. Vijay Kumar D bad Director Tourism, Cyril V.D. Diengdoh.
