Nongpoh, Nohprah 14: Lada ka jingangnud ka Dorbar Shnong Mawtnum ha Ri Bhoi kan urlong kumba la thmu ne mang kyrpang, kan long ka jingmyntoi kaba khraw tam ym tang ha kaba kyntiew ia ki kam jngohkai pyrthei, hynrei kan long ruh kawei na ka lad ka lynti ban ioh kam ioh jam ne ban kyntiew ia ka ioh ka kot ki paidbah, namar na ka liang ka shnong Mawtnum kaba don harud ka surokbah National Highway-6 ha Ri Bhoi ka la poi sha ka siejam ban tei noh da kawei ka jaka kaba khring ia ki nongjngohkai pyrthei ba la tip kum ka ‘Ri Bhoi Bamboo Park’ kaba la thmu ban tei ha jaka jong ka shnong kabdon harud katei ka surokbah Shillong-Guwahati.
Kine ki jingshisha ki paw pyrthei, ka dei hadien ba mynta ka sngi, u Chairman ka Meghalaya Industrial Development Corporation (MIDC), u James K. Sangma kum u kongsan u la wan ban buh ia u mawnongrim ban tei ia katei ka Ri Bhoi Bamboo Park, ha ka shnong Mawtnum, ha kaba la sakhi lang ruh da ka jingdon lang u MLA ka Umsning u Dr. Celestine Lyngdoh, u Rangbah Shnong ka Shnong Mawtnum, u Bah Bad-hok Nongmalieh, u Additional Deputy Commissioner ka Ri Bhoi u Bah M.B Tongper, ki ophsiar na MIDC, ki paidbah nongshong shnong bad kiwei ki riew rangbah.
Kumba la pynpaw, kane ka Ri Bhoi Bamboo Park, ka dei ka jingiohi jngai bad ka jingangnud ba la lamkhmat da ka Shnong Mawtnum ha kaba ki la thmu ban shna ha kata ka rukom ban khring ia ki nongjngohkai pyrthei bad ba kan long ruh kum kawei na ka nuksa kaba kin sa shna bad pyndonkam tang da ki siej ka ban long ka lad ai kam ai jam bad ban kyntiew ia ka ioh ka kot ki paidbah nongshong shnong hi baroh kawei.
Kumba la pynpaw ruh da u Bah Bad-hok Nongmalieh, kane ka dei ka jingangnud ka shnong ban tei ia kane ka Ri Bhoi Bamboo Park ym tang ba kan long ka jaka jngohkai pyrthei, hynrei ka dei ruh ban ai jingmyntoi ia ki paidbah ha ka liang ka ioh kam ka ioh jam bad ruh ban kyntiew ia ka ioh ka kot ki paidbah nongshong shnong.
U la ong ruh kane ka Bamboo Park kin shna bad pyndonkam tang da ki siej suda, kumba ka Ri Bhoi ka don byllai ia u siej bad kaba long ruh shi bynta ban iada ka mariang, namar u siej u dei u jaid jingthung uba lah ban heh ban san tang hapoh ka 2 snem bad lada pom da ki dieng pat ka shim por ba kin heh kin san bad kane ka ktah ia ka mei mariang.
Shuh shuh, u la ong ruh kin sdang noh ia ka kam ban pyntreikam ia kane ka Bamboo Park bad ha ban poi sha ka thong kaba ki angnud ki donkam ruh ia ka jingkyrshan ka sorkar, ha kaba kane ka Ri Bhoi Bamboo Park kan long kawei na ka nuksa ban pynsngewthuh sha ki paidbah halor ka jingioh jingmyntoi na ki jingdon jingem hapoh ka mei mariang bad ruh ba ngi dei ban pyndonkam ha kata ka rukom ka ban nym ktah ia ka mei mariang.
Na ka liang u James K. Sangma kum u kongsan bad u Dr. Celestine Lyngdoh, MLA ka Umsning, ha ba ai jingkren ha kane ka sngi, ki la ai jingiaroh ia ka Dorbar Shnong Mawtnum, kiba la don ia kane ka jingiohi jngai bad kane ka lah ban long ka sien nyngkong ban shna ia kata ka Bamboo park kaba kin pyndonkam tang da ki siej.
“Kumba ia u siej lah ban pyndonkam ha kiba bun bynta ban myntoi ki paidbah, ki kyrmen skhem ruh ba kane ka Bamboo Park kan long kawei na ka lad ai kam ai jam bad ban kyntiew ym tang ia ka ioh ka kot ki paidbah, hynrei kan long ruh ka lad ba ka sorkar ka lah ban lum khajna lada ngi lah ban pyntreikam ha kata ka rukom kaba janai bad paka” la ong u Bah James. K. Sangma.
Shuh shuh, u la ong ruh na ka liang ka sorkar ruh lyngba ka MIDC kan pyrshang ban thaw ia ki lad ki lynti ban iarap, namar ka jingtei ia kane ka Bambook Park ka dei kawei na kaba ym ktah ia ka mariang kumba long kiwei kiwei ki Karkhana kiba ktah ia ka mariang bad khlem lyngba ka jingdon kum kine ki jingtei kiba donnam kan kyntiew ruh ha ka laing ka kam jngohkai pyrthei ban myntoi naduh ki paidbah bad ruh ka sorkar jylla hi baroh kawei.
