Nongpoh, Nohprah 14: Kum ka jingkitkhlieh ban iakhun pyrshah ia ka jingktah u drok ba bun ki khun samla ki la ngop bad ki la jot ka jingi, u Bah Eddie G. Kharbani, u la ong ba kum u Samla Rangbah ka Ri Bhoi, u kloi ban mih madan na ka bynta ban ia khun pyrshah ia u Drok, khnang ba bun ki khun samla ba lui lui kin nym ngat ha ka tyrsim jingpynjot jong u drok uba la kynrei bha ha kane ka jylla jongngi.
U Bah Eddie G. Kharbani, u la ioh lad ban pynpaw ba u don kata ka mynsiem ban ia khun pyrshah ia u drok ka dei ha ka jingiaid paidbah ban ialap pyrshah ia u Drok ba la pynlong da ka Seng Samla Catholic ka Umsning Parish ryngkat ka jingiatrei lang bad ka RI Bhoi Area Welfare Association mynta ka sngi ha Umsning.
Kum u kongsan haba ai jingkren ha kane ka jingai jinghikai ne ka jingialap pyrshah ia u Drok bad HIV/AIDS, u Bah Eddie G. Kharbani, u la ong ba la donkam kata ka jingkitkhlieh shuwa na la ing ba kin don ia kata ka jingkitkhlieh ba ki hap ban peit pyrman ia la ki khun, khnang ba ki khun ki kti jongki, kin nym poi ban ngop sha u drok bad dei lyngba ka jingngop ha u drok ba ka don ruh ka jingma ban poi sha ka apot ban ngat ruh ia ka jingpang HIV/AIDS, namar ki jy pyndonkam da ujuh u thyrna haba dih drok.
Namar kata, ka dei kamram jongngi, iwei-pa-iwei, ba ngi hap ban don ka jingkitkhlieh ha kaba ia khun pyrshah ia u drok bad ruh ban ai jinghikai ia ki khun samla ba kin lait na u drok bad ruh na katei ka jingpang HIV/AIDS, haba ki la tip ia ki lad ki lynti kumno ban iada ia lade.
Kiwie kiwei kiba la ia don lang ha kane ka sngi ki kynthup ia u Bah Eddie Kharbani kum u kongsan bad ruh la sakhi da ka jingdon lang u Bah Rocky Kylla, Chairman ka Umsning Town Dorbar, ka Kong B. Umbah, President ka RAWA; u Bah Meban Tariang, Center In-charge ka Kripra Foundation, u Bah R. Ranee, Assistant Director ka IEC MACS; u E. Marak, Officer-in-Charge ka Umsning Police Station bad kumjuh ruh ki nongialam ka Seng Samla Umsning Parish bad kiwei kiwei ki khun samla.
Ha kane ka sngi, la pynlong shuwa ia ka jingiaid paidbah na CFC Hall Parish Umsning ban iaid lyngba ka sor Umsning bad la pynkut ha madan Umsning, ha kaba ki khun samla ki la rah ia kai placard bad ki banner ban ialap pyrshah ia u drok bad ban tip ia ki lad jingiada ban lait na ka jingpang HIV/AIDS bad bun sa ki jingai jinghikai kumno ban lait na kitie ki jingsniew kiba ktah ia ki khun samla kane ka juk ba mynta.
