Nongpoh, Nohprah 12: Ha ka jingialang paidbah ka party Congress, kaba la long mynta ka sngi ha Jatah ha ka thain Mawhati, u kyrtong ka party Congress na Mawhati u Bah Dominic Mynsong, uban aireng na ka party Congress na Mawhati, u la kren kren shai ba u sngewskhem ban jop h akane ka election MDC na Mawhati, wat lada ka party Congress ka la shah iehnoh jyndat ha u MLA bad MDC u Bah Charles Marngar, uba la jop na kane ka party bad uba la leit ban pyniasoh pat sha ka party NPP.
U Bah Dominic Mynsong u la pynpaw ruh ia ka jingsngewskhem mynsiem ban jop ha kane ka election MDC na Jirang, ka dei ha ka jingialang kaba la long mynta ka sngi ha Jatah, ba ki nongialam ka Ri Bhoi District Congress Committee ha ka jingialam u Bah M.G Kharshanlor kum u President lem bad kiwei ki nongialam ki la leit ban pynskhem bad ban pynthikna ba ia ka ticket MDC na Mawhati la pynkhamti ha u Bah Dominic Mynsong bad ryngkat ruh ka jingkhyrkhu kyrdoh ba un poi sha ka thong jong ka jingjop ha kane ka election MDC 2025 na Mawhati Constituency.
Ha kane ka sngi, ba la pynbna ia ka kyrteng u Bah Dominic Mynsong kum u Kyrtong ka Congress na Mawhati ha kane ka election MDC la sakhi lang ruh da ka jingdon lang u President ka RBDCC ha ka jingialam u Bah M.G Kharshanlor kum u President, u Bah John Lamarai, President ka Mawhati Block, u Bah Phrangsngi Syngkli, President ka Jirang Block, u Bah Sunlight Shadap Working President ka RBDCC lem bad kiwei kiwei ki heh nongialam ka party Congressna Ri Bhoi.
Ki nongialam ka Party Congress kynthup ia u Bah Dominic Mynsong kum u kyrtong, ki la pynpaw ia ka mynsiem jong ka jingsngewskhem ba party Congress na Mawhati kan sa jop don burom ha kane ka election MDC, namar katei ka Constituency ka dei ka Constituency ba ki paidbah ki don ka jingshaniah ha ka party Congress kum ka party kaba shakri na ka bynta ki duk ki rangli ha ka jylla bad ka ri hi baroh kawei.
Ki la pynpaw ruh ba wat la ka party Congress ka shah iehnoh bein ha u MLA bad MDC uba dei u Bah Charles Marngar, hynrei kum ki paidbah kin iai neh beit ha ka party Congress bad kin ieng skhem ruh ban pynjop don burom ia ka party Congress ha kane ka election MDC 2025 na Mawhati Constituency.
