Nongpoh, Nohprah 20: Ka Hill Farmers’ Union Central body hapoh ka Jingialam u General Secretary U Bah Allfondbirth Kharsyntiew bad u President ka Sonidan Circle u Bah Roswell Shadap ki ioh ban leh kmen bad ki nongrep kum ka dak ban rakhe ia ka Advance Khristmas bad snem thymmai.
Ka seng ha katei ka sngi, ka la ioh ban sam ia ki nongrep da ki symbai jhur ban thung ha ka por tlang bad kine ki nongrep ki dei kyrpang na ka shnong Pamphlang bad sonidan area
Kumba ngi tip ba ka shnong Pamphlang ka dei ka shnong kaba sei soh bha bad ka khlain bha ban pynmih jhur bad ki nongrep ki rep ruh ha ka por tlang.
Ha katei ka sngi la ioh ruh ban ai sngewbha kum ka jingai sngewbha Khristmas ia ki dkhot kiba ju trei shitom ban kyrshan ia ka Union ha ki por ba ka seng ka donkam ia ki. Ka Seng ka la ioh ban ot sngewbha ruh ia u cake kum ka dak ka jingrakhe ia ka Khristmas, kaba dei ryngkat ka jingiadon ryngkat jong ki Nongrep, ki nongkitkam bad ki dkhot jong ka HFU Sonidan Circle.
Na ka liang u general Secretary, u Bah Allfondbirth Kharsyntiew, u la pynsngew ba ka seng ka kwah ban pynshlur ia ki nongrep ban rep ruh ha ka por tlang tangba kaba kham kongsan eh, ka dei ba ki nongrep ki donkam ia ka um bad ki symbai. Kumta na ka liang ka seng ka kwah ban kyrpad ia ka sorkar ban iarap ia ki nongrep halor kane ka kam rep ha ka por tlang, khnang ba ngin nang lah shuh shuh ban kyntiew ia ka ioh ka kot jong ki nongrep, lada ki nongrep ioh ban rep la ha ka por lyiur bad por tlang kumjuh.
