Nongpoh, Nohprah 20: Haba leit ban plie paidbah ia kawei na ka lympung ialehkai phutbol mynta ka sngi ha ka Shnong Kbet Nongbri ha Ri Bhoi District, u Samla Lambokstarweel Marngar, kum u President ba rangbah ka seng Khasi Students Union (KSU); u la ong, “Ki samla Khasi jongngi, ki dei samla kiba ba don ia ka sap ba kyrpang bad kim dei pat ki samla kiba don ia kata ka mynsiem jong ka jingiaishah”.
Da kaba kren ia kitei ki kyntien ban ai mynsiem ia ki khun samla kiba dei ki trai muluk ki trai jylla, u Samla Lambokstarwell Marngar, u la ong ba ka jingialehkai phutbol ha kine ki sngi, kam dei shuh tang kata ka bynta ban kyllan met na ka bynta ban ioh ia ka met kaba koit kaba khiah, hynrei ka la dei ka por ba ki samla kiba don ia ka sap ha ka jingialehkai phutbol ka la long ka lad ban pynim ia lade shimet bad kumjuh ia ka la ka ing ka sem, ha kaba u la pynpaw ruh ba bun ki samla Khasi mynta ki la don ha ki Club bapher bapher hapoh ka ri India kaba long shisha ka jingsarong ia ka ri bad ka jaid bynriew.
U la ong ruh ba la don ka khep kaba u la ioh ba ia syllok kyrpang bad uwei u rangialehkai phutbol ba paw jong ka jylla, u Samla Aibor Khongji, ka jubab kaba u la ioh na ka jingiasyllok ka long ba bun shisha ki saMla Khasi ki don ia kata ka sap kyrpang khamtam ha ka jingialehkai phutbol, hynrei kim dei pat kita ki samla kiba lah ban iaishah, ha kaba shiteng por ki mih noh na ki club bad ki wan phai noh sha la ïing na ka daw ba ki don ia kata ka thong ban pyndonkam hok ia kata ka sap kyrpang ba la ai da u Blei.
“Ngim lah ruh ban len lada don ki tournament ne ki lympung ialehkai ha ka ri, kaba nyngkong lada ngi kwah ban peit ha ki durkhih, ngi wad nyngkong shwa la ki don neem ki samla Khasi bad lah ruh ban ong ba ki samla Khasi ki la ioh ban rung na ki Club bapher bapher bad kaba sah ka long tang ba kin pyndonkam hok ia ka sap kaba ki don khnang ba ka sap kaba ki don ha ka jingialehkai phutbol kan da long shisha kaba ai jingmyntoi bad kum kata ka lad ioh kam ioh jam kaba long ka jingsarong ia ka jaid byrniew” ong u Bah Lambokstarwell Marngar.
U la ong ruh ngi im ha kane ka juk ba bun ki jingiatynjuh ha ka jingim bad lada ki samla kim don kata ka mynsiem ban pyndonkam hok ia ka sap ba la ai u Blei, ka long ruh ka jingma ia ka jaid bynriew, namar ka ri bad ka jaid bynriew ka donkam ia kita ki samla kiba don ka jingkitkhlieh la ki don ha kano kano ka kam kaba ki tei la ka long ha kam ialehkai sport ne ha kiwei ki kam.
Shuh shuh, u bynrap ruh da kaba ong, ka jingma kaba khraw bha mynta ka dei ka jingkynrei u drok ba la shalan tuh sha kane ka jylla, ba bun ki samla ba lui lui ki la jot bad lada kum ki samla kim kyndit bynriew ka long shisha ka jingma ia ka jaid bynriew, namar ban ia khun pyrshah ia u drok kam dei tang ha ka sorkar ne ka tnad Pulit, hynrei donkam ban don kata ka jingiatrei lang na baroh ki liang. Lada ki khun samla kin lait na kiba bun ki jingdih basniew bad lada ki koit ki khiah ha ka met bad ha ka pyrkhat ka pyrdain lah ban saindur ia ka lawei ba phyrnai jong ka jaid bynriew, u la bynrap.
Kum ban pynpaw, kane ka lympung ka dei ka lympung ialehkai phubbol ba la tip kum ka ‘1st Inter Dong Football Tournament’, ha kaba la pynlong da ka kynhun ki ‘Shiparalok’ ba la plie pyrda mynta ka sngi ha madan ialehkai ka shnong Kbet Nongbri bad ha kane ka sngi nalor u nongialam ba rangbah ka seng KSU, la sakhi lang ruh da ka jingdon lang u Samla James H. Mawphniang, General Secretary ka KSU North Khasi Hills District, u Bah Kyrsoi Mawphniang, u Samla Omilsha Nongpoh lem bad kiwei ki nongialam ka KSU na Ri Bhoi.
Ha kane ka lympung ialehkai phutbol, ki don 20 tylli ki kynhun kiba la wan ban shim bynta na ki phra tylli ki shnong ha ka thain Kbet Nongbri. Ki kynhun kiba ia aireng ha kane ka sngi, ka dei hapdeng ka Dong Sohlawa (Mawkba) pyrshah ia ka Dong Jusong (Nongsangu), ba ka dong Sohlawa, ka la jop da 3-1, katba ha ka jingiakhun kaba ar, hapdeng ka Dong Bir pyrshah ia ka Dong Mawshah, ka Dong Bir ka la jop da 3-0.
