Nongpoh, Nohprah 21: U Bah Damanbait Lamare, MLA Umroi ha ryngkat u Bah Rangkynsai Kharbuki, MDC ha ka 20 tarik u Nohprah 2024, ki la leit ban jurip ia ka shnong Umket, ka shnong kaba hap ha Umroi Constituency bad kaba don mynta ka jingpynkhreh ban pdiang ia ka jingiaseng Synod Rangbah jong ka Ri Bhoi Presbyterian Synod.
Katei ka jingleit jurip jong u MLA bad MDC, ka long kum shibynta ban tip ia ka jingdonkam hapoh katei ka shnong, ka ban pdiang ia ka jingiaseng Synod Rangbah ha u 2025, ha kaba ki jingdonkam ki kynthup naduh ki lynti iaid, ki jaka ieng kali, ka umbam umdih lem bad kiwei ki jingdonkam.
Ka jingleit jurip, ka long ban tip ia ka jingdonkam bad ruh kum u MLA ba un nang ha ka rukom ban pynioh ia ki jingdonkam hapoh katei ka shnong, khnang ba ka jingpynkhreh jong ki ban pdiang ia ka jingiaseng Synod, kan long kaba iaid beit iaid ryntih.
