Nongpoh, Nohprah 23: Kumba ka kynhun ki Hindu ba la tip kum ka Kutumba Surakshya Parishad (KSP), ki la byrngem ban pynlong da ka jingiakhih ha ha ka thain Byrnihat bad Khanapara ha ka 24 tarik u Nohprah 2024, lada ka jingdawa ban ioh leh niam ha ka Krem Mawjymbuin kam urlong kumba la dawa na ka sorkar Meghalaya bad ki bor synshar District na Ri Bhoi ki la pynthikna ba kin nym ailad ia katei ka kynhun ban pynlong ia ka jingiakhih ba ka ktah ka ka shongsuk shongsain ki paidbah khamtam kane ka aiom ka dei ka aiom lehkmen na ka bynta ka Christmas bad snem thymmai.
Ban pynkynmaw, halor kane ka bynta, ka kynhun ki Hindu ba la tip kum ka ka Kutumba Surakshya Parishad (KSP), ka la dep ban dawa na ka sorkar jylla ba dei ban ailad ia ki kynhun Hindu ban lehniam ha ka krem Mawjymbuin ha Mawsynram bad ki la byrngem ruh ba lada ka jingdawa kam urlong kin pynlong noh da ka jingiakhih ha ka thain Byrnihat shaduh Khanapara ban khang lynti ia ki paidbah ka jylla Meghalaya.
Haba la ioh ban ia kren bad u Deputy Commissioner ka Ri Bhoi u Abhilash Baranwal bad u Superintendent of Police ka Ri Bhoi, u V.S Rathore, ki la pynthikna ba kin nym ailad ia kitei ki kynhun ban pynlong ia ka jingiakhih ha ka thain Byrnihat shaduh Khanapara, ba kane ka ktah ia ka shongsuk shongsain ki paidbah bad kumjuh ruh ia ki paidbah nongleit nongwan lyngba kane ka surokbah ban rung sha ka jylla Meghalaya.
Ki la iathuh ruh ba naduh ka ophis u deputy commissioner bad ruh ka ophis u SP ka Ri Bhoi, ki la dep ban ia kren bad ki bor synshar ka Kamrup Metro, ban ia trei lang bad ban nym ailad ia katei ka kynhun ban pynlong ia ka jingiakhih la ka long ha u pud u sam ka Meghalaya ne ha u pud u sam ka jylla Assam.
Shuh shuh, ki la ong ruh ba ki la dep ban pynlong ia ka jingpeitngor ban pynthikna ia ka shongsuk shongsain ki paidbah bad da lei lei kin nym ailad ban pynlong ia ka jingiakhih da katei ka kynhun kaba la byrngem ban pynlong ia ka jingiakhih ha ka thain Byrnihat-Khanapara bad na ka liang ka bor synshar District naduh ka ophis u Deputy Commissioner bad ruh ka tnad Pulit ki la pynlong ia ka jingpeitngor bad ruh ban pynbiang ia ki bor pahara ban nym ailad ia katei ka kynhun ban pynlong ia kata ka jingiakhih ha katei ka surokbah ba pyniasoh sha Meghalaya lyngba ka jylla Assam.
