Nongpoh, Kyllalyngkot 16: Ki nongialam jong ka Federation of Khasi Jaintia and Garo People (FKJGP) North Khasi Hills District ki la pynpaw ia ka jingsngewkhia jur halor ka jingiaid lait ki bor ba dei khmih ka North East Police Academy (NEPA), Umiam iala ki kyndon haba aiwai ia ki dukan jong ka NEPA Shopping Complex sha ki bar jylla.
Hadien ka jingioh jingtip ia katei ka kam, ki nongialam ka seng hapoh ka jingialam u Bah Luistar Lyngdoh, President ka FKJGP NKHD hynnin ka janmiet ki la leit ban jurip dalade bad lap ba ki hynniew tylli ki dukan ba la ioh da ki bar jylla kim don satia ia ka Trading License na ka Khasi Hills Autonomous District Council (KHADC) kumba ki bor pyniaid kila dep ban buh hashwa ban aiwai ia kitei ki dukan kiba don ha NEPA Shopping Complex.
Halor kane ka bynta, na ka liang ka seng kala kynduh bad ioh ban iakren ruh ia ki bor ba dei jong ka NEPA ban dawa ba kidei ban shimkhia ban pynbeit ia kane ka kam bad ai por ruh 30 sngi ia kitei ki bar jylla ba kidei ban pynbiang ia ka Trading License ka jongki.
Kum ban shu kdew, na ki khyndai tylli ki dukan kiba don ha katei ka NEPA Shopping Complex, ar tylli kidei kiba la ioh da ki Khasi katba hynniew tylli pat kidei kiba la ioh da ki bar jylla.
