Nongpoh, K’lyngkot 16: Na ka bynta ban phai khmat kyrpang ia ki jylla shatei lam mihngi ka ri India khamtam hapoh ka jylla Meghalaya, ha kaba kyntiew kyrpang ia ki kam rep katkum ka juk stad ha kine ki sngi, ka College of Post- Graduate Studies in Agricultural Sciences (CPGS-AS), Umiam, Central Agricultural University (CAU), Imphal, mynta ka sngi ka la plie paidbah noh ia ka National Conference ba ar sngi lynter ha Auditorum Hall ka CPGS-AS, Umiam, Meghalaya bad la wan plie paidbah da ka Kong Ampareen Lyngdoh, kaba dei ka myntri ka tnad rep hapoh ka jylla Meghalaya.
Kane ka National Conference ka dei halor ka phang ha ka ktieng nongwei, “Enhancing Agricultural Growth with Special Reference to North East India: Synergizing Industry and Scientific Innovations for Demand-Driven Crop Improvement”, ba ka jingthmu ka long ban phai khmat kyrpang ban kyntiew ia ka kam rep ka kam riang ban ioh jingmyntoi ki nongrep ha kane ka juk stad kaba ki hap ban pyndonkam da ki kor ki bor.
Nalor ka kam Ampareen Lyngdoh kum ka myntri ka tnad rep hapoh ka jylla Meghalaya, kiwei kiwei kiba la ia don lang u Prof. D Thakuria, Chairman & Dean, CPGS-AS, Umiam, Dr. S. V. Ngachan, Former Director ICAR-NEH, Umiam, Dr. J. C Rana, Country head Bioversity, New Delhi, Dr. A.K. Mohanty, Director ATARI-Zone-VII, Dr. T R Sharma, Registrar and Director of instruction, CAU, Imphal lem bad kiwei kwei.
Kane ka jingpynlong ia ka National Conference la ia trei lang ruh bad ka Indian Council of Agricultural Research (ICAR), North Eastern Council, Ministry of Agriculture and Farmers Welfare, bad ka NABARD, bad ba la wan ban shim bynta haduh 200 ngut bad kynthup ruh ki riew shemphang bad ki samla pule.
Haba kren ha kane ka sngi kum ka kongsan, ka Dr. Mazel Ampareen Lyngdoh kum ka myntri sorkar ka la ban khia halor ka jingdonkam ban kyntiew ia ki nongrep ba kin ioh jingmyntoi ar shah lyngba ka kam rep ka kam riang bad ka la pynpaw ruh ba ka sorkar ka don ruh ia ka thong ban dang kyntiew ia ki nongrep lyngba ka rep tynrai bad ruh ban dang pynmih shuh shuh shibun ki symbai jingthung kiba ai jingmyntoi ia ki nongrep.
