Nongpoh, K’Lyngkot 17: Ka lyer elekshon sha iing Dorbar Thawaiñ jong ka KHADC ha Umroi Constituency kala nang khluid katba nangmih ki sngi, hadien ka jingpra noh ka Umroi Constituency Progressive Forum (UCPF) naka jingshet kylla jong u Bah MD Syiem u ba kum ka kynhun UCPF kala dep ban mynjur iaka tiket bad rai ban long u kyrtong MDC ha kane ka elekshon ban wan, hynrei khlem poi pyrkhat u Bah MD Syiem tang hadien katto katne por u la phet noh na katei ka kynhun hadien ba u ioh tiket sa naka seng Congress hadien ba ka seng Congress pat kala pynduh tiket noh ia u bah Albinus Lyngdoh u ba la trei shitrhem haka party mynta la bun snem bad u ba dei ruh u MDC barim ka Umroi.
Halor katei ka jingshet kylla u Bah MD Syiem naka liang ki nongkyrshan jong ka UCPF hapoh ka jingïalam jong u Bah George B Lyngdoh MLA barim ka Umroi kila lum da ka jingïalang mynta ka sngi ha Umroi Umdohbyrthih ban thaw pat sa da kawei ka kynhun kaba la tip kum ka Umroi Democratic Front (UDF) bad ha katei ka jingïalang la shim ruh ïaka rai ban pynieng syndon da u Bah George B Lyngdoh kum u kyrtong shimet jong katei ka kynhun UDF ha kane ka elekshon MDC bad da ka jingiasngewthuh jingmut lang ruh u Bah Albinus Lyngdoh lem bad ki nongkyrshan kiba la rai ban kyrshan noh ïa u Bah George B Lyngdoh hadien ba u la shah pynduh tiket noh naka party Congress.
Haba kren ha kane ka sngi naka liang u Bah George B Lyngdoh u la ong naka liang jong u bad u Bah Albinus Lyngdoh kila lum la lang ïaki paidbah nongkyrshan jong ka Umroi naka bynta ban pyrkhat kyrpang ïaka lawei jong ka Umroi Constituency kyrpang eh naka bynta ka elekshon MDC bad la mir jingmut ruh hadien ka jingphet noh u kyrtong ba ka UCPF kala thmu ban pynieng hadien ba u kyrtong lem bad katto katne ngut kila leit ban pynïasoh noh ïalade sha ka party congress kaba ngim iahap jingmut bad kumjuh ruh ryngkat bad u Bah Albinus Lyngdoh u ba la shah pynduh tiket noh haka party congress kila shim ïakawei ka jingmut ban saindur thymmai iaka lawei jong ki paidbah ka Umroi Constituency.
U la ong ruh ba ha katei ka jingïalang naka liang ki nongkyrshan kila shim ruh ka rai ban pynieng kyrtong syndon da u Bah George B Lyngdoh u ba dei ruh u MLA barim ka Umroi kum u kyrtong shimet ha ka lama ka Umroi Democratic Front (UDF) ha kane ka elekshon MDC ban wan.
Naka liang u Bah Albinus Lyngdoh u la ong ba haduh mynta um shym poi pyrkhat ba ka seng Congress kan pynduh tiket MDC ïa u wat hadien ka jingtrei shitom kaba la bun snem, hynrei kaba sngew lyngngoh ba ki ai tiket ïa u briew u ba dang rung haka seng tang haka shi sngi ar sngi, kumta da kawei ka jingmut bad ka jingsngewthuh jingmut lem bad ki nongkyrshan u la shim ïaka rai ban kyrshan noh ïa u Bah George B Lyngdoh ha kane ka elekshon ban wan naka bynta ban pynjop donburom ïa u ryngkat ka jingkyrpad ïaki paidbah ba kin ai ka jingkyrshan kaba tyngeh.
