Nongpoh, Jan 18: Ka seng Federation of Khasi-Jaintia and Garo People (FKJGP), North Khasi District mynta ka sngi ka la lah ban pynthymmai biang ia ki nongkitkam na ka bynta ka samoi treikam jong u snem 2025 haduh u snem 2028 bad ha kane ka sngi ki nongialam ba rangbah ka FKJGP ha ka jingdon lang u President u Bah Dundee C. Khongsit, u la shim ia ka bynta kum u kongsan ban pynskhem bad pynbam smai ia kine ki nongnialam ba thymmai katkum ka riti treikam jong ka seng.
Ia kane ka jingialang pynskhem ia ki nongialam ba thymmai ka FKJGP North Khasi Hills District la pynlong ha Parish Hall, Nongpoh, ha kaba u President ba rangbah ka seng u Bah Dundee C. Khongsit u la long kum u kongsan bad ha ryngkat ka jingdong lang u General Secretary ka seng kmie u Bah Aldie Newton Lyngdoh lem bad kiwei kiwei ki nongialam ka sengkmie.
Kitei ki nongialam ba thymmai ka FKJGP North Khasi Hills District Unit ki kynthup ia u President ba la jied ia u Bah Luistar Lyngdoh, Senior Vice President Lumlang Mawnai, Vice President Shanlang Diengdoh, general Secretary Ricky Majaw, Assistant Secretary, Artison Khongstid, Chief Organizing Secretary Kitborlang Suting lem bad kiwei kiwei.
Haba kren ha kane ka sngi kum u President ba rangbah ka seng FKJGP, u Bah Dundee C. Khongsit, u la pynpaw ia ka jingsngewdiaw ba ka jylla ka la kot sha ki 53 tylli ki snem ka jingiaid lynti ba la ioh la ka jong ka jylla, hynrei haphai sha ka jylla ki don shibun ki jingduna ba ki paidbah ki dang ia kynduh haduh kine ki sngi ba kum ka seng ka hap ban phai khmat ne shim khia ban ia tynrong lem ia ki jingeh jong ki paidbah.
U la ong ruh ka seng FKJGP ka ieng halor ka nongrim ban shakri ia ki para doh ki para snam hapoh ka jylla bad dei namar kane ka daw ka seng ka pyniar ia ki shnat treikam ha ki bynta bapher bapher jong ka jylla bad ka nongrim ka seng ka long ba ki nongialam seng ki hap ban peitngor bad ban phai khmat ban peit lem ia kata ka eh ka shon jong ka jaid bynriew.
Shuh shuh, u la bynrap ruh da kaba ong, ba ka seng FKJGP kan dang iaid trei shitom ban kit ban bah ia ka eh ka shon ka jaid bynriew bad kan iakhun pyrshah ruh ia kino kino ki bor kiba pynthame ia ka jaid bynriew bad kum ka seng lyngba ki nongialam ki kloi ruh ban rung sha ka ingbyndi na ka bynta ban ia khun ia ka dawbah jong ka jaid bynriew, lada ki bor ba na shabar ki pyrshang ban tynjuh ia ka jaid bynriew Khasi jongngi, u la bynrap.
