Nongpoh, K’lyngkot 20: Ki Pulit ka Ri Bhoi lyngba ka tnad Traffic ryngkat ka jingiatrei lang bad ki Pulit traffic ka Nongpoh Police Station ki la dang peitngor ban pynlong ia ka jingtehlakam ia ki Kali ba pynkhein ain bad ha kajuh ka por kum shi bynta ban pynsngewthuh paidbah ki la sam ruh da ki Helmet sha ki Kali ar shaka khnang ba kin hap ban bud ia ki kyndon ain niah kali.
Na ka liang ki Pulit traffic ha ka sngi u Blei ki la pynlong ia ka jingkhynra ia ki Kali saw shaka bad ruh ki Kali ar shaka ha sor Nongpoh na ka bynta ban tehlakam ia kito ki Kali kiba pynkhein ia ki kyndon ain, kaba buh jingma ia ki paidbah ha ka leit ka wan bad khamtam ia kito kiba shong ha kitei ki Kali.
Kum ban pynsngewthuh paidbah, ki Pulit ki la sam ruh ia ki Helmet ia ki Kali ar shaka naduh ki kynthei, ki khynnah bad ki rangbah kiba niah ia ki kalai ar shaka bad kane ka long kum ka jinghikai ba kin sngewthuh ia ki kyndon ain niah kali, na ka bynta ban iada na kino kino ki jingjia ba sngewsih kaba ju jia tang na ka daw ka jingpynkhein ia ki kyndon ain niah kali ba la buh da ka sorkar.
U Heh Pulit ka Ri Bhoi, u Vivekananda Singh Rathore, u la ong ba ki pulit traffic ki la pynlong ia kane ka jingkhynra ia ki kali bad ruh ban sam ia ki Helmet, ka long shi bynta ka jinghikai ia ki paidbah ba kin dup sngewthuh ia ki ain niah kali, namar bunsien ka jingpynkhein ia ki kyndon ain niah kali ka ju wan rah ia ki jingjia ba sngewsih.
U la ong ruh kane ka jingkhynra ia ki kali ba pynkhein ain, ka long shi bynta ban peitngor ruh na ka bynta ka jingrakhe ia ka Republic Day, ka ban long ha ka 26 tarik u Kyllalyngkot 2025.
Namarkata, u la bynrap ruh da kaba ong, ba kane ka jingtehlakam ia ki kali ba pynkhein ain, ka long ban pynsngewthuh ruh ia ki paidbah halor kata ka jingshngain ia ki paidbah bad ha kajuh ka por, ka tnad Pulit kan sa dang bteng ruh ban khynra ia ki kali kiba pynkhein ain, khnang ban ioh ban tehlakam ia kito kiba pynkhein ain ba kane ka ktah ia ki paidbah bad ruh ia kito kiba shong ne niah ia ki kali, u la bynrap shuh shuh.
