New Delhi, Jylliew 07: U Prime Minister ka Ri India u Narendra Modi bad u nongialam ba hakhmat duh ka party Bharitya Janata Party (BJP) hapoh ka ri, u la pynkhreh biang ban shimti ia ka shuki myntri rangbah ka ri ha ka sien kaba lai, ha ka sorkar kaban lamkhmat da ka National Democratic Alliance (NDA) hadien ka jingjop da 292 tylli ki seat ha kane ka election MP 2024 kaba dang shu pyndep ban niew ia ki votes ha ka 4 tarik Jylliew.
Lah ban kdew ruh, ban lamkhmat ia ka Iingdorbar Thawain jong ka Lok Sabha donkam haduh 272 ki MP bad ha kane ka kynti jong ka sorkar NDA 3.0 la jied biang ia u Narendra Modi kum u nongialam jong ka NDA, kaba la ioh ruh iaka jingkyrshan jongka party Telugu Desam Party (TDP) ba lamkhmat da u Chandrababu Naidu, kaba la jop 16 tylli ki Lok Sabha seat bad Janata Dal (United) kaba la lamkhmat da u Nitish Kumar, kaba la jop 12 seat ha Andhra Pradesh bad Bihar.
La ioh ruh ia ka jingtip, ba hadien ka jingiakynduh kaba kyrpang hapdeng ki nongialam ka BJP lem bad ki TDP bad JD (U), la shim ruh ia ka rai ban pynlong ia ka jingbam smai jong baroh ki MP jong ka NDA ban shimti biang ia u lakam synshar sorkar ha ka ri, ha ka 9 tarik Jylliew 2024 naduh ka por 6 baje janmiet ka ban long ha ka nongbah New Delhi.
Kumba long mynta, ka jingwan kyrshan ka party TDP bad JD (U) ia ka party BJP ban thaw biang iaka sorkar NDA, na ka liang u nongialam ka TDP u Chandrababu Naidu u la buh ia ka jingdawa na u Prime Minister Narendra Modi ia shibun ki bhah kyrpang hapoh kane ka sorkar NDA kaba kynthup naduh ka shuki myntri haka tnad Finance, Roads, Health bad Education, ka kam Speaker bad ka jingbhah kyrpang ia ki kam pynroi hapoh ka jylla Andra Pradesh bad kiwei kiwei de.
Ha kaba ia dei pat bad ki jingdawa bhah kyrpang ba la buh da ka party JD (U) u Nitesh Kumar u la pan ia ki mang kyrpang ba kynthup ban ioh haduh lai tylli ki shuki myntri hapoh ka tnad Railways, Rural Development, Transport, Agriculture bad kiwei kiwei de kiba u Narendra Modi un hap ban pynurlong.
