Nongsder, Lber 05: Ki nongialam shnong ka Nongsder ha Ri Bhoi District, ka la mih ban pynrem jur ia kiba donkti ban leh ia ka kam tuh kam sniew da kaba buh ia ka karkhana shna kyiad beaiñ hapoh u pud u sam jong ka shnong, ha kaba la pynpaw ruh ia ka jingsngewlyngngoh kaba khraw ba wat ka shnong kam don jingtip satia halor katei ka ktem shna kyiad beaiñ.
U Bah Johnas Lyndem, Rangbah Shnong ka Nongsder, u la iathuh, ba ki nongialam shnong tang mar ia ioh jingtip halor ka jinglap bad ioh kurup shibun ki tiar shna kyiad beaiñ da ka tnad Excise marmar hi ki la leit ban jurip ia katei ka jaka bad lap shisha ia ka jingdon jong katei ka karkhana shna kyiad beaiñ kaba don ha ka jaka kaba kham pajih bad ka bym ju don nongleit nongwan.
U la iathuh ruh, ba na ka liang ki nongialam shnong ki la lum da ka jingialang kaba kyrkieh ban ia kren halor katei ka jingmih jong ka jaka shna kyiad beaiñ hapoh u pud u sam ka shnong khlem da don jingtip da ki trai shnong, kumta la kyrpad ia ki bor ka ain ban pynshitom tyngeh ia kito kiba donkti ban leh ia kane ka kam sniew kaba la pynjah burom ia ka shnong ka thaw hi baroh kawei.
Shuh shuh ruh, na ka liang ka shnong Nongsder ka la buh ia ka jingmaham ia kino kino ki briew kiba thmu ban leh ia kum kine ki jait kam sniew hapoh u pud u sam jong ka shnong lada lap kin shah pynngat ha ki kyndon kiba tyngeh jong ka Dorbar Shnong, da kaba bynrap ruh, ba donbok ba ia katei ka ktem shna kyiad la lap shwa da ki bor ka ain hynrei te jin da lap da ka shnong kane ka jaka ka la kylla dpei naduh mynno.
