Nongpoh, Lber 05: Kum uwei na u Samla na ka Ri Bhoi District bad uba don ruh ka jingduna ha ka dkhot met, u Samla Pering Pale na ka Shnong Umpowin ha Ri Bhoi District, u la ai khublei kyrpang ia ka Director General of Police ka Kong Idashisha Nongrang halor ki lad jingiarap ba ka la iarap kyrpang ia u kum uwei na u samla ba don jingduna ha ka dkhot met.
Haba ia kren mynta ka sngi sha ki lad pathai khubor, u Samla Pering Pale, u la ong ba kane ka dei ka sien kaba nyngkong ba kum u samla ba duna ha ka dhot met u la ioh ban ia kynduh kat ia ka DGP ka Meghalaya ban pynpaw halor ki jingeh jong u bad nalor kata, katei ka heh pulit ka jylla ka don ruh ia ka mynsiem ban iarap lem ia kum uwei na u samla ba don jingduna ha ka dkhot met.
U la pynpaw ruh ba u don shisha ka jingeh ha ka leit ka wan na ka daw ka jingduna ha ka ki kjat kiba um lah ban leit ban wan kumba biang ka dkhot met, hynrei lyngba ka jingiarap ka DGP u la ioh lad ban thied ia ka Scooty ba la phah shna kyrpang bad ba don 3 shaka na ka bynta ban pynsuk ia u ha ka leit ka wan.
Kum u samla u la ai khublei kyrpang ruh ba u kitbok kitrwiang ia ka DGP ba kan ai ka jingshakri kaba kyrpang ia ka bha ka miat ki paidbah ha ka jylla bad ruh ba kan dang phai khmat ym tang ia u kum u samla ba don jingduna ha ka dkhot met bad kumjuh ruh ia kiwei ki para mynsiem kiba don jingduna ha ka jingim jongki.
Shuh shuh, kaei kaba u la pynpaw ia ka mynsiem jong ka jingkmen ha ka jingim kum u samla ba duna dkhot met, ka dei kaba u la pynpaw da kaba ong, “Lyngba ki tiar ba la iarap da ka DGP, u la sngew aram ka met ka phat ha ka leit ka wan bad u la hun jrut, namar ba u la lah ban pyndonkam ia ka Scooty kaba u la thied ban pyndonkam ha ka leit ka wan lyngba ka jingiarap ka DGP ka jylla”.
