Nongpoh, Lber 10: Ki nongialam shnong ha ryngkat ki paidbah nongshong shnong ka Shnong Lumnongrim, Byrnihat, ki la pynpaw ia ka jingkmen bad ka jingsngew sarong, kaba dei hadien dang shen ba u MLA ka Jirang u Bah Sosthenes Sohtun u la shah jied kum u MDC ha ka election MDC ba dang shu dep na ka Jiranng Constituency.
Da ka jingsarong ka Shnong Lumnongrim lem bad ki paidbah kum ka jingburom ia u Bah Sosthenes Sohtun uba la dei lang mynta kum u MLA bad MDC ka Jirang, ki la pynkup borom ha ka 8 tarik u Lber 2025 kum ka jingai burom ia u ba u la shah jied ruh ha ka kyrdan MDC.
Ia kane ka program pynkup burom la pynlong ha ka Iingdorbar Lum Nongrim Byrnihat, ha kaba la sakhi ia ka jingiadonlang u Bah Sosthenes Sohtun, MLA/MDC, Bah Iaineh Wahlang Rangbah Shnong, Bah Vigyan Kharkongngor, President Seng Samla Shnong Lumnongrim nalor kiwei kiwei ki riew rangbah bad ki nongshong shnong.
La sakhi ia ka jinglehkmen kaba iphuh iphieng bha da ka jingiashimbynta bynta ki khun samla ban pyni ia ki sap shad bad rwai kum ka dak ban ai burom ia u Bah Sohtun u ba dei ruh u nongshong shnong ka Lumnongrim Byrnihat.
Haba ai jingkren ha kane ka sngi u Bah Sosthenes Sohtun u la ai khublei kyrpang ia ki nongialam shnong ka Lumnongrim bad ki nongshong shnong hi baroh kiba la pynlong ia ka program ban leh burom ia u da kaba ai khublei kyrpang ruh halor ka jingkyrshan kaba radbah ba ki la ai ban pynjop ia u kum u MDC.
U la kular ruh ban dang iatrei ryngkat bad ki paidbah bad ha kajuh ka or ban pynurlong ia ki thong kiba u la khlei paidbah na bynta ka bit ka biang bad ka roi ka par jong ka Constituency hi baroh kawei.
