Nongpoh, Lber 10: Hapdeng shibun ki jingiaid lynti ba kum ki nongri syiar ha Ri Bhoi District ki ia kynduh jingeh ha ka kam ri syiar, ka Ri Bhoi Poultry Farmers Association (RBPFA) mynta ka sngi ka la plie syndon da ka ophis ba pura ha Nongpoh Town Shopping Complex.
Ia kane ka ophis ba pura jong kane ka seng ki nongri syiar la wan ban plie paidbah da u Dr. Esra Syiem, District AH & Veterinary Officer ka Ri Bhoi kum u kongsan bad la sakhi lang ruh da ka jingdon lang u Rangbah Shnong ka Shnong Nongpoh, u Bah Sylvester Mynsong, u Bah Antonio Lapang, Adviser ka seng, ka Kong E. Lapang, President, u Bah A. Diengdoh, Vice president bad kiwei kiwei de.
Kumba la pynpaw da u Bah Antonio Lapang kum u nongaibuit kane ka seng, la ong ba kane ka jingplie ia kane ka ophis ka long shi bynta ban ia saindur ia ka kam ri syiar ha Ri Bhoi bad ka jingdon kane ka ophis kan iarap shibun ia ki nongialam ba kin ioh ban ia tai ne ia thir ia ki jingeh ki nongri syiar bad khamtam ka thong ban kyntiew ia ka ka ri syiar kaba long kawei na ka lad kamai ba ki nongri syiar ki lah ban kyrshan ia ka ing ka sem ha kum kane ka pyrthei kyrduh kam kyrduh jam.
Na ka liang u Dr. Esra Syiem haba kren ha kane ka sngi, u la ai jingiaroh ia kane ka seng ki nongri syiar kiba la ioh ia ka lad ban plie noh da ka ophis treikam ba pura bad ka jinglah ban plie ia kane ka ophis treikam ka long kawei na ka lad ba kin ioh ban ia kren ia ki kam ki jam ne ki jingeh ba ki nongri syiar ki ia kynduh kum kita ki nongri syiar hapoh ka District.
Shuh shuh, u la ong ruh ba na ka liang ka department ruh kan kloi ban ia trei lang bad kane ka kynhun na ka bynta ban kyntiew ia ki kam ri syiar ha ka District bad ha kajuh ka por u la pynpaw ruh ba dei tang ka jingiatrei lang ngi lah ban kyntiew ia ki nongri syiar khmatam ha kane ka juk kyrduh kam kyrduh jam ka kam ri syiar ka la dei kawei na ka lad ban ai kam ai jam ne ban kyrshan ia ka ing ka sem lyngba ka kam ri syiar.
