Shillong, Lber 11: Da ka jingpyrshah kaba jur ia ka jingthmu jong ka Sorkar jylla Meghalaya ban wanrah ia ka lynti rel bad ruh ban pyntreikam ia ka kyndon ain Meghalaya State Investment Promotion and Felicitation Act 2024, mynta ka sngi ki nongialam bad dkhot ka KSU ki la tur kynsan sha ka Iingdorbar Thawain ban dawa pyndam shwa ia kine ki jingthmu katba ym pat pyntreikam shwa ia ki ain kiba pyrkhing.
Ha kane ka jingmih iaid paidbah ka KSU la lamkhmat da u Samla Lambokstar Marngar President, Samla Donald Thabah, General Secretary nalor kiwei kiwei ha kaba la bud lang da palat spah ngut ki dkhot ka seng kiba la rah ruh da ki placard, poster ban pynpaw ia ka jingpyrshah kaba jur ia ka jingthmu pynlong ain ia ka MSIPF bad ruh ia ka jingthmu wanrah lynti rel ha Ri Khasi Jaintia.
Na ka liang ka KSU ka la pynsawa jam ia ka sur ban iai pyrshah jur ia ka MSIPF da kaba pyrta ruh ba kito kiba kyrshan ia ka Invest Meghalaya Authority (IMA) ki dei ki mendie ri.
Ngim pdiang da leilei ia ka lynti rel, katba ka sorkar jylla kam pyntreikam shwa ia ka Inner Line Permit (ILP) ban khang pyrshah ia ka jingioh rung kyrthlep ki mynder ri bad ki bar jylla.
Ha ka jingpyrshang ki nongialam ka KSU ban tur sha ka Iingdorbar Thawain hynrei la wan ban pynsangeh noh shiteng lynti da ki bor pulit kiba la khang lynti noh ha Lad Rilbong.
