Shillong, Lber 11: Tang hadien ba ki bor ka sorkar jylla Meghalaya, ki la khot ban ia kren ia ki nongialam ka KSU, hadien ka jingialang na ka liang ka seng ka la kyntait bad ym hun satia ia kaei ba la kren bad ki bor ka sorkar jylla.
Ka jingkhot jong ka sorkar jylla Meghalaya ban ia kren bad ki nongialam ka KSU, ka la long hadien ba ka jingthmu tur sha ka Iingdorbar Thawain da ka seng ban pyrshah ia ka jingthmu pynlong ain ia ka Meghalaya State Investment Promotion & Facilitation Act (MSIPF), ka jingpyrshah lynti rel bad CAA.
Haba pynpaw ia ka jingsngewbym hun ka KSU ia ka jingiakren pynbeit ba la khot da ka sorkar, u samla Donald V Thabah u la ong, ba kane ka jingialang ba la pyniaid da u Myntri Rangbah ka jylla ha ka jingiadonlang bad ki ar ngut ki Symbut Myntri Rangbah bad u Chief Secretary lem bad kiwei kiwei ki ophisar kam long katkum ka jingangnud jong ka seng.
U la iathuh ruh, ba ha kane ka jingialang ki bor ka sorkar jylla ki la pynsngew ba ka sorkar jylla ka don jingthmu ban iaid beit ban pynlong ain ne pyntreikam ia ka MSIPF, ha kaba u Conrad Sangma u la kular ban khot jingialang bad ki kynhun sengbhalang lem bad ki kynhun bapher bapher ban wanrah jingkylla ha ka MSIPF bad yn sa rah ban iatai ha ka Dorbar Tlang jong ka Iingdorbar Thawain.
U Samla Donald Thabah, u la pynsngew ruh ba ha ka jingiakren bad u Myntri Rangbah ka jylla, la ong ba ka seng ka la dawa ba kane ka MSIPF ka dei ban ioh ka jingshaniah bad ka jingshngain ia ki trai muluk ym ia kito kiban wan bei pisa, kumta ka sorkar jylla ka dei ban pyrkhat shwa halor kane shwa ban pyntreikam ia kane, da kaba bynrap ba ka seng shen kan sa shong pyrkhat lyngba ka CEC ban shim rai pat kumno ban shim ia ka sienjam lada ka sorkar kam pynurlong ia ka jingdawa.
