Nongpoh, Lber 11: U wei u nongniah kali kamai local tourist taxi u la khlad hashen ha ka jingiatyngkhuh bad kawei ka trok kaba wan mar pyrshah. Kane ka jingjia ka la jia mynta ka nohphai sngi ha ka por 1 baje eiei ha u surok Shillong Bypass ha ka shnong Umroi Umdohbyrthih.
La ioh jingtip na ki pulit, ba u tei u ba la khlad noh la tip kyrteng kum u Twalson Kharbudnah na ka shnong Umsmu Umsaitsning, Ri Bhoi District.
La iathuh ruh, ba kane ka jingjia iatyngkhuh kali ka la jia tang namar ka jingpynher sted jong u nongniah ka local tourist taxi kaba don ia u number ML 06 8101 bad iaid ruh na ka liang bym dei ban iaid tad haduh bym shym la lah ban tehlakam shuh bad leit tynrah pat ia ka trok kaba don ia u number ML 04 D 0386.
Tang mar ia ioh jingtip halor kane ka jingjia, ki pulit ka Khapmara PIC ki la leit ban pynlong ia ka jingtohkit halor katei ka jingjia bad ka jingtohkit kaba bniah ban tip ia ka daw tynrai ka dang iaid shapkhmat ban leh katkum ki kyndon jong ka aiñ.
