Shillong, Lber 12: Ka jingshah thang ki kali sorkar ki dei ki khubor kiba la paw bha ha ka jylla Meghalaya khamtam haba don ki jingiakhih bapher bapher bad kine ki jingjia ki la kham duna mynta la katto katne snem, hynrei la ioh khubor pat ba hynne ka step phyrngap ka la don biang ka jingshah thang kawei ka kali sorkar ha ka thaiñ Nongmynsong, East Khasi Hills District.
Katkum ka khubor ba la iohlum, ba kawei ka kali sorkar Meghalaya kaba dei ka Swift Desire bad don ia u number ML 05 AB 1290 la suba ba ka la shah thang ha ki runar bym lah ban ithuh ki dei kiei kaba la jia ruh ha ki por 2:30 ne 3 baje mynstep ha ka shnong Nongmynsong Dong Kadiang, East Khasi Hills District.
La ioh khubor ruh, ba ki pulit ka Nongmynsong Police Station, kiba la ioh jingtip halor katei ka jingjia ki la leit marmar sha katei ka jaka ban pynlong ia ka jingtohkit bad la suba jur ruh ba katei ka kali ka la shah thang ha ki runar namar ka don ruh ia ka jingthoh kaba kdew ba ka dei ka kali jong ka Sorkar Meghalaya lyngba ka jingthoh ha ka number plate.
La iathuh ruh, ba ia kane ka kali la pynieng harud u surok ha Dongkadiang jong ka Nongmynsong baroh shimiet kumta na ka liang ki pulit ki dang pynlong ia ka jingkhmieh bniah bad ruh ia ka jingtohkit halor katei ka jingjia shah thang katei ka kali sorkar ban lap ia ka jingshisha la ka dei ka jingshah thang ne ba kem ding.
