Nongpoh, Jylliew 08: Ki paidbah nongshong shnong ha ka them Ri Bhoi District kiba la kot kumba 50 tylli ki longing ki la pynpaw ia ka jingkmen kaba khraw ban ioh pdiang ia ki tyndong lyer ban shet ban tiew ia kaba la pynmang lyngba ka skhim Pradhan Mantri Ujjwala Yojana scheme (PMUY) ia kaba la pyntreikam da ka sorkar pdeng naduh u snem 2016 hapoh ka Ri India hi baroh kawei.
Lah ban kdew, ba ka sorkar pdeng jong ka Ri India ka la pynmih ia ka skhim PMUY ban pynioh lem ia ki longiing bad ki nongshong shnong hapoh ka Ri India kiba hap hapoh ka thup Below Poverty Line (BPL) ia ka lad ban shet jingshet kaba kham pynsuk kum kiba long lem kiwei ki longiing da kaba pyndonkam da ki tyndong lyer shet jingshet bad ban ioh ia kane ka skhim ha ka dor kaba tad tam haba nujor bad kiwei pat ki rukom applai ia kine ki tyndong lyer shet jingshet.
Haba pyntip halor kane ka jingsdang ban sam ia ki tyndong lyer shet jingshet, u wei na ki nongtrei ka Ri Bhoi Gas Agency, u la pyntip, ba ha Ri Bhoi District ka jingsam ia ki tyndong lyer ki la sdang ban sam sha ki paidbah na ka longiing BPL la katto katne sngi bad kumba 50 tylli ki longiing hapoh ka thain Nongpoh kin ioh pdiang mynta ka 8 tarik u Jylliew 2024.
U la iathuh, ba da shisha kane ka skhim jong ka sorkar pdeng kaba la tip kum ka PMUY ka long shisha kaba la pyn myntoi bad pynioh lad lem ia ki longiing baduk ban ioh ka jingsuk ha kaban shet ban tiew lyngba kine ki tyndong lyer shet jingshet ha ka dor kaba bit bad kaba lah ban kot bor da ki longiing baduk hapoh ka District Ri Bhoi bad ha ka Ri hi baroh kawei.
