Nongpoh, Iaïong 12: Kawei ka Staff Nurse kaba dang trei Officiating ha Civil Hospital Nongpoh ka la duh noh ia la ka jingim, kaba dei hadien ba ka Kali kaba ka shong ka la leit ban tynrah na shadien jong ka kawei ka Trok kaba dang iaid ha ka surokbah National Hihway-6 ha ki bynta jong ka Lumumpih ha Ri Bhoi District. Kane ka trok ba katei ka Kali ka la leit ban tynrah ka don ia u number ML 10 C 0234 bad la niah da u Shiningstar Nongbri (2) uba dei na Eastern West Khasi Hills District
Kane ka jingjia ka la jia hynnin ka miet ha ka por 11 baje ei ei mynmiet ha kaba katei ka Staff Nurse ba la tip kyrteng kum ka Phyllashisha Lynser, (25) na ka shnoing Umbir Lawsyiem, Ri Bhoi District, ka la shong da kawei ka Kali Alto kaba don ia u number OR 02 AG – 7804 bad khlem poi pyrkhat kane ka Kali kaba ka shong ma ka bad ba la niah da u Chirub L. Nonglait (27) na Iewrynghep Mawlai Shillong ka la leit ban tynrah nadien ka trok kaba la pynlong ia ka ban duh noh ia la ka jingim namar ka jingmynsaw jur.
Kumba la ioh lum jingtip, la ong ba ha kane ka jingjia, baroh ar ngut ki la mynsaw jur bad sahkut shapoh ka trok, ha kaba ia u dribar la iarap sei da ki paidbah kiba la wan ban iarap halor kane ka jingjia bad ia kane ka Nurse pat la hap ban pyndonkam da ka kali ban khwai, ha kaba la rah noh mardor sha CHC Umsning, hynrei ynda haba la poi ha katei ka jaka ai jingsumar ki Doctor ki la pyntip ba kane ka Nurse ka la khlad noh bad utei u dribar uba niah ia katei ka Kali ruh u la mynsaw jur.
La ong ruh ba ka jingmynsaw jur u dribar bad katei ka Nurse kaba la duh noh ia la ka jingim, ka dei na ka daw ba katei ka kali kaba ki shong ki la rung syndon sha ki bynta ba shadien jong ka trok bad dei lyngba ka jingiarap ki paidbah bad ruh da ka kali ban khwai la lah ban sei ia ka met jongki.
Shuh shuh, ki pulit ki la ong ruh ba ia ka met jong ka Nurse la rah noh sha Civil Hospital Nongpoh ban pyndep ia ka postmortem examination bad ia katei ka trok bad ka Kali Alto la rah noh sha Umsning Police Outpost, ha kaba ka jingtohkit halor kane ka jingjia ka dang iaid shaphrang.
