Nongpoh, 13 Iaiong: U Damanbait Lamare, MLA Umroi, u la lah ban aiti haduh 32 tylli ki Work Order sha ki shnong bapher bapher kiba hap ha Umroi Constituency bad nalorkata, u la lah ruh ban aiti da ki tin sopiing sha ki 615 ki longiing ha ki 83 tylli ki shnong bapher bapher kiba don ha Umroi Constituency.
Katei ka jingaiti Work Order bad aiti ia ki tin sop iing na bynta kito ki longiing kiba donkam jingiarap, ka dei kaba mynta ka Taiew, ha kaba kitei ki Work Order kaba u la aiti sha ki shnong, ki kynthup naduh ia kaba shna ia ki lynti iaid kjat, ki Iing Dorbar, ki ophis jong ki seng longkmie, ophis Seng Khasi lem bad kiwei.
Haba iadei bad katei ka jingsam Work Order bad ruh ban sam tin sop iing sha ki paidbah, u Damanbait Lamare, u ong ba kum u nongmihkhmat ka Umroi, u la trei shisha na bynta ka jingmyntoi ki paidbah ha Umroi Constituency bad ban pynioh jingiarap na bynta jong kito kiba donkam jingiarap.
U la ong ruh ba nangne shakhmat, un sa nangpynioh ia shibun ki kam pynroi ha ki shnong bapher bapher kiba hap ha Umroi Constituency, khnang ba kan long ka jingmyntoi ia ki paidbah hapoh ka Umroi Constituency hi baroh kawei.
