Nongpoh, Ïaïong 13: Kawei ka samla ka la duh syndon ia la ka jingim bad uwei pat uba ñiah ia ka Scooty kaba ki shong u la mynsaw jur, hadien ba katei ka Scooty ba ki shong ka la shah tynrah kynsan ha kawei ka trok kaba la pynher sted bha kaba la jia mynta ka janmiet jong ka sngi u Blei ha surok Shillong By-pass.
Kane ka jingjia ka la jia ha ka por 4 baje ei ei janmiet, ha kaba katei ka Scooty kaba don ia u number ML 05-AA-9898 ka dang wan hiar na Umroi Umdohbyrthih da ka jingthmu ban leit sha Umroi Nongrah, hynrei hadien ba la poi ha jan ka Tyndai Resort ka la shah tynrah kynsan ha ka trok haduh ba katei ka Samla ba shong nadien ka la duh ia la ka jingim bad u ba ñiah ia ka Scooty u la mynsaw jur.
Kane ka samla kaba la duh noh ia la ka jingim, ha kane ka jingjia la tip kyrteng kum ka Sidora Langstieh (29) na ka shnong Nongsder, Block-B, bad utei u nongñiah Scooty ba la mynsaw jur la tip kyrteng kum u Rai Singh Laloo (30) na Umroi Nongrah, Ri Bhoi District.
Kumba la ioh lum jingtip, la ong ba ki Pulit na Khapmara ki la hiar mardor sha katei ka jaka ban pynlong ia ka jingtohkt bad lap ba katei ka Samla ka khlad ha katei ka jaka bad u nongñiah scooty ba la mynsaw la rah noh mardor sha CHC Bhoirymbong ban ioh ia ka jingsumar, hynrei ki Pulit ki pyrshang ban twet jur ia katei ka Trok ba la phet bad kim sham la lap ksai satia.
La iathuh ruh ba ki Pulit ki la pyntip sha ki Pulit ka Mawryngkneng bad Mawlasnai da ka jingthmu ban ioh bat ia katei ka trok, hynrei haduh mynta kim pat ioh ban bat bad ka jingtohkit halor kane ka jingjia ka dang iaid shaphrang.
Shuh shuh, la ong ruh ba ia kane ka samla ba la khlad noh la rah noh sha Civil Hospital Nongpoh na ka bynta ka Postmortem Examination bad na ka liang ki Pulit ki dang ia trei lang ban ioh ban bat ne kem ia katei ka trok kaba leit ban tynrah ia ka Scooty haduh ba katei ka samla ka la duh ia la ka jingim bad u nongñiah scooty u la mynsaw jur.
