Nongpoh, 14 Iaiong: Ka la long ka jingkmen kaba khraw eh ia ki paidbah nongshong shnong jong ki 8 tylli ki shnong kiba don ha ka thaiñ Nongtraw, Bhoirymbong bad kata ka dei ba mynta ka sngi, u Damanbait Lamare, MLA Umroi Constituency, u la leit ban plie paidbah ia Health Sub Centre (Health & Wellness Centre) kaba don ha shnong Nongtraw, Ri Bhoi District.
Katei ka Health Sub Centre, kaba la plie paidbah mynta ka sngi ha Nongtraw, ka dei ka ban sa ai jingshakri ia ki Phra tylli ki shnong ha katei ka thain, kiba kynthup ia ka shnong Umsarang, Nongtraw Bangla, Lumdiengngan, Lumrit, Kyrdeng, Wah Myntait, Mawkduk, ha kaba lyngba katei ka Heath Sub Centre, ki paidbah kin sa ïoh ia ka jingshah sumar bad khamtam eh na bynta ki longkmie bad ki khyllung rit.
Ia katei ka Heath Sub Centre, la tei ha ka jinglut kaba la kot sha ka T. 55 lak, ha kaba la shna bad pynwandur bha da ka VEC Nongtraw.
Haba plie ka katei ka Nongtraw Health Sub Centre, nalor u MLA, la sakhi ruh da ka jingdon ka Dr. A Kharduid, DMHO Ri Bhoi, u Bah Robert Dympep, Rangbah Shnong Nongtraw, kiwei ki nongtrei ka koit ka khiah bad ki riew Rangbah ha ryngkat ki paidbah nongshong shnong jong katei ka thain.
U Damanbait Lamare, haba u ai jingkren ha katei ka sngi, u la kyrpad ia ki nongtrei, ki ban sa trei hapoh katei ka Sub Centre, ba ki dei trei bha bad ym dei ban mih kano kano ka jingshah kynthoh halor ka jingtorti ka rukom treikam ha Nongtraw Sub Centre, khnang ba katei ka Sub Centre, kan da long shisha ka ban ai jingmyntoi ia ki paidbah jong katei ka thaiñ hi baroh kawei.
