Nongpoh, 13 Iaiong: Ki nongialam ka NPP Taksu Circle, kaba kynthup ia ki 10 tylli ki shnong kiba don ha katei ka thain, hynnin ka sngi Saitjain, ki la pynkup burom ia u Bah Sosthenes Sohtun, MLA Jirang bad uba dang shu jop ha kane ka Ilekshon MDC kaba dang shu dep shen.
Ia katei ka prokram ban pynkup burom ia u Bah Sosthenes Sohtun, la pynlong ha Iing Dorbar ka shnong Taksu, ha kaba ka nongrim kaba la pynlong ia kitei ki nongkitkam ka NPP Tasku Circle, ka dei ba ki sngewkmen eh, hadien ba u Bah Sosthenes Sohtun, uba long kum u MLA Jirang bad uba la jop don burom ha kane ka Ileshon MDC ba dang shu dep.
Haba iadei bad katei ka jingpynkup burom, na ka liang ki nongialam shnong ka thain Tasku, ki la ong ba ka nongrim kaba la pynlong ia ki ba kin pynlong ia katei ka jingpynkup burom kaba kyrpang, ka dei ba ki sngewkmen eh ba u Bah Sosthenes Sohtun, un long kum u MDC katei ka thain, kata nalor ka kam kaba u long kum u MLA.
Ki la pynpaw ruh, ba ka jingpynkup burom jong ki ia u Bah Sosthenes Sohtun, ka dei hadien ba ki la iohi bad lap ba u dei u briew uba biang eh, uba sngewrit bad uba trei shisha na bynta ka jingmyntoi jong ki paidbah ha Jirang Constituency hi baroh kawei.
Katba na ka liang Bah Sosthenes Sohtun, haba iadei bad katei ka jingpynkup burom da ka NPP Taksu Circle, u la pynpaw ia ka jingsngew nguh, namar ka jingkynmaw jong ki bad uba la ong ruh ba nangne shakhmat un dang trei bha shuh shuh, khnang ba kan long ka jingmyntoi ia ki paidbah ka Jirang hi baroh kawei.
