Nongpoh, Jymmang 11: Da kawei ka rai bad ka jingmut kaba skhem ki paidbah nongshong shnong ka Shnong Sabuda bad kiba dei ruh ki jaid bynriew Khasi ba hap ha ka Raid Nongtung ha khappud ka jylla Meghalaya bad Assam, hapoh ka Raid Nongtung, Ri Bhoi District ki la kyntait ban leit thep kyteng EPIC sha ka jylla Assam ha kaba ki la pynpaw ba ki la don lypa ka Voter Identity Card na ka jylla Meghalaya.
Kane ka jingshim rai ban nym lei thep kyteng sha ka jylla Assam na ka bynta ban pynrung kyrteng ha ka electoral roll ka Assam, ka dei hadien ba la wan poi ka shithi na ka ophis u Deputy Commissioner ka West Karbai Anglong, Hamren ban pynlong ia ka jingialang na ka bynta ban pynrung kyteng ha ka Electoral Roll bad ruh ban thep kyrteng Aadhar Card kaba la rai ban pynlong ha ka 10 tarik u Jymmang 2025 ha ka Shnong Sabuda.
Ki paidbah nongshong shnong ka Sabuda hadien ba la ioh jingtip halor kane ka shithi ba la wan poi na ka ophis u Deputy Commissioner ka West Karbi Anglong, Hamren lyngba ka Election Branch, ha ka 9 tarik u Jymmang 2025 ki la lum kyrkieh ia ka jingialang ha katei ka shnong ba la shim bynta naduh ki Longkmie, ki Longkpa bad ki Samla bad da kawei ka rai ki la shim rai ban nym treh ban pynrung kyrteng ha ka thup jong ka Electoral Roll ka jylla Assam na ka bynta ban ioh ia ka EPIC, namar baroh ki nongshong shnong ki la dep ban ioh pdiang na ka sorkar Meghalaya.
Kumba la ioh lum jingtip, kitei ki paidbah nongshong shnong ki la kren shai ruh ba kumno kin dang pynrung kyrteng ha ka thup jong ka electoral roll ka jylla Assam, namar kum ki nongshong shnong ki la dep ban ioh ia ka EPIC na ka jylla Meghalaya.
Ki la pynpaw ruh da lei lei ba kin nym treh ban pynrung kyrteng ha ka thup jong ka electoral roll ka jylla Assam, namar na ka liang ka Election Commission ka ri India, ka la dep mana lypa ba uno uno u nongshong shnong un nym dei ban don ar tylli ki EPIC ha ki 2 tylli ki jylla, khamtam katei ka shnong ka dei ka shnong kaba dang ia kajia pud hapdeng ka Meghalaya bad ka Assam.
Halor kane ka jingshim rai ban kyntait ban pynrung kyteng ha ka electoral Roll ka jylla Assam, na ka liang ka shnong ki la dep phah ruh da ka shithi sha u Booth Level Officer katei ka thaiñ ban pynpaw halor kane ka jingpyrshah bad ruh ba un rah ia kane ka khubor sha ka ophis u Deputy Commissioner ka Ri Bhoi bad wat sha ka sorkar Meghalaya ba ki paidbah nongshong shnong ka Shnong Sabuda kin nym treh da lei lei ban pynrung kyrteng ha ka thup jong ka Electoral Roll ka jylla Assam.
