Guwahati, Jymmang 10: Kum uwei u rangbah ba la ioh pdiang ia ka Padma Shri Award bad u Nongthoh History ba la paw bha, u Prof. David Syiemlieh mynta ka sngi Saitjaiñ u la leit ban ai jingkren kyrpang ha ka skulbah Assam Don Bosco University, Assam ban ai mynsiem ia kiba bun ki samla pule ba ki dei bandon ka jingangnud bad ruh ban tih bniah ia ki jingbatai shaphang ki History bapher bapher.
Haba kren ha kane kane ka sngi, u Prof. David R Syiemlieh bad uba dei ruh u dkhot ka Board Management ka Assam Don Bosco University, u la bet shibun ki symboh pyrkhat halor ka jingithuh, ki history hapoh ka thain bad ka rukom jingpynkylla ia ki bynta ba ioh jingmyntoi lyngba ka pule ka puthi.
” Ka History kam dei tang kata kaba shu thoh tang ia ki tarik ne ki jingjia, bad ka History ka dei ruh ka ingpule shaphang ka jingdonkam ban don ia ka bor sngewthuh kaba janai ia ki jingeh jong ka long briew ka man briew kaba ki la dep ia kynduh ne don bynta da kaba ioh lum ia ki jingtip kiba bniah bad wad ruh ia ki History kiba ym pat shym la pynpaw pyrthei” ong u Prof. David Syiemlieh.
Shuh shuh, u Prof. David Syiemlieh, ha kane ka sngi u la kren ruh halor ka bynta ka jingwad bniah jong u kaba u la buh jingtoh shaphang ka jingdon ki Nong Portugal ha ki jylla shatei Lam Mihngi ka ri India, ka jingwad bniah jong u ia ki kot ki sla shaphang u Syiem Tirot Sing Syiem na London bad ruh kaba u la don bynta kaba khraw ha kaba buh ia ka ‘Museum’ ka Northeast India ha ophis treikam ka UPSC, New Delhi.
Ha kane ka sngi, nalor ki samla pule katei ka skulbah, la don ryngkat ruh u Vice chancellor u Fr. Jose Palely, u Vice Provincial ka Guwahati Provice u Fr. Bivan Mukhim bad kiwei kiwei ki nonghikai katei ka skulbah.
Nalor ka jingailad ban ia twad jingmut, ha kane ka sngi la pynlong ruh ia ka jingiathung dieng bad ki jingpyni ia ki riam tynrai ba la shim bynta da ki samla pule katei ka skulbah.
